Ռումբի մասին ահազանգից հետո մարդկանց տարհանել են Վերսալի պալատից

16:09 • 20.12.23

Վերսալի պալատի այցելուներին ստիպել են անհապաղ լքել այդ պատմական համալիրի տարածքն այն բանից հետո, երբ իրավապահները մի անանուն աղբյուրից ահազանգ են ստացել այնտեղ ռումբի տեղադրման մասին:

Ազատության փոխանցմամբ, այս մասին հաղորդել է Radio France Info-ն։

Պալատական համալիրի վարչակազմը հաստատել է, որ ռումբի մասին հաղորդումից հետո տարհանվել է մոտ 2 հազար այցելու։ Տվյալ պահին տարհանումն ավարտվել է, և համալիրի տարածքում զննություն է իրականացվում:

Այս տարվա ընթացքում Վերսալի պալատում առնվազն 7 անգամ է տարհանում հայտարարվել, քանի որ պետական և հանրային տարբեր կառույցներ ահազանգեր, հեռախոսային հաղորդագրություններ և էլեկտրոնային նամակներ են ստացել պայթուցիկ սարքերի տեղադրման մասին: