Yandex-ը սեփական հակավիրուսային ծրագիրն է գործարկել
Yandex որոնողական համակարգը մշակել է հակավիրուս, որը կստուգի կայքերում վնասատու ծրագրերի առկայությունը: Վկայակոչելով ընկերության ներկայացուցիչ Օչիր Մանջիկովին` այս մասին գրում է ռուսական «Վեդոմոստի» թերթը:
2009-ից, երբ Yandex-ն սկսեց զբաղվել ինտերնետում վիրուսների խնդրով, Մանջիկովն օգտագործում էր ամերիկյան Sophos ընկերության ծրագրերը, բայց այժմ հրաժարվել է համագործակցությունից: Նրա գնահատմամբ` հակավիրուսային մեկ արշավի շուրջ Sophos-ի հետ պայմանագրի արժեքը կազմում է տարեկան $0.7-1 մլն:
Հակավիրուսների մեծ մասը հիմնված է սիգնատուրային մոտեցման վրա. կայքն ստուգելիս ինտերնետային էջի ծածկագիրը նրանք համեմատում են իրենց ծանոթ նշանների հետ և եթե գտնում են համապատասխանություն, համարում են, որ այն վարակված է:
Մանջիկովն ասում է, որ այս տեխնոլոգիան անզոր է հատկապես այն վիրուսների դեմ, որոնք դեռ ընդգրկված չեն հակավիրուսային բազայում: Ըստ նրա` ավելի արդյունավետ է վարքագծային մոտեցումը, երբ օգտատիրոջը նմանակող ռոբոտն այցելում է կայք և սկսում վերլուծել, թե ինչ է կատարվում համակարգում:
Եթե հանկարծ որևէ ծրագիր է սկսում բեռնավորվել կայք կամ եթե տվյալ ծրագիրն սկսում է ինքնիրեն աշխատել, ապա, ամենայն հավանականությամբ, կայքը վարակված է, ինչի մասին հակավիրուսային ծրագիրը տեղեկացնում է օգտատիրոջը:
Սակայն Կասպերսկիի լաբորատորիայի գլոբալ հետազոտությունների կենտրոնի ղեկավար Ալեքսանդր Գոստևը նշում է, որ վարքագծային մոտեցումն արդեն չի ապահովում արձագանքման անհրաժեշտ արագությունը: Նրա խոսքով` ինտերնետում վիրուսների հայտնաբերման համար հարկավոր է ոչ միայն նմանակել օգտատիրոջ վարքագիծը, այլև վերլուծել նրա իրական գործողությունները:










