Հայաստանի առաջատար ինտերնետ պրովայդերը Beeline-ն է

14:09 • 17.03.10

Circle.am ինտերնետ վարկանշային համակարգի և b24.am-ի կազմած «Ինտերնետը Հայաստանում» զեկույցի համաձայն՝ 2010թ. փետրվարի տվյալներով Հայաստանի առաջատար 10 ինտերնետ պրովայդերների ցուցակը գլխավորում է Beeline-ը, որի մասնաբաժինը շուկայում կազմում է 38.48%։

Ցուցանիշները որոշվել են պրովայդերների և AMNet ցանցին միացած այլ ընկերությունների IP-ներից վերջին մեկ ամսվա ընթացքում Circle.am-ում գրանցված այցելությունների հիման վրա։

Beeline-ի առաջատար լինելը, ըստ Circle.am-ի, հիմնականում պայմանավորված է dial-up և ADSL (Hi-Line) ծառայությունների մատուցմամբ, իսկ Beeline-ի բջջային ինտերնետի ծավալները մոտավորապես համապատասխանում են ընկերության մրցակիցներ Vivacell-MTS-ի և Orange-ի նույն ծառայության ծավալների մակարդակին` 11-12%։

Երկրորդ տեղում է (12.27%) Orange-ը։ Գործունեության 3 ամիսների ընթացքում բջջային երրորդ օպերատորին հաջողվել է չափազանց բարձր ցուցանիշ արձանագրել, ընդ որում` միայն բջջային ինտերնետի հաշվին։

Երրորդ տեղում է Vivcell-MTS-ը, որի բաժինը կազմում է 11.69%։

Չորրորդ տեղում է ADC ընկերությունը` 7.76% մասնաբաժնով, որին հաջորդում է Arminco-ն` 6.83%։ Cornet-ը 4.99%-ով 6-րդն է, iCON-ը` 7-րդը (4.29%), իսկ Ucom-ը (2.38%) զբաղեցնում է ցուցակի 8-րդ հորիզոնականը։

Հայաստանի առաջատար 10 ինտերնետ պրովայդերների վարկանշային ցուցակի 9-րդ տեղում է Web-ը, որի բաժինը շուկայում կազմում է 1.57%, իսկ տասյակը եզրափակում է Bionet-ը (1.36%)։ Առաջին տասնյակում հայտնված ընկերություններին բաժին է ընկնում ինտերնետ այցելությունների 91.62%-ը։