Եղանակն՝ այսօր
Ազգային մշակութային արժեքների ոչնչացումը նույնպես Ցեղասպանություն է. Հրանուշ Հակոբյան
«Մշակութային ցեղասպանություն» խորագրով միջազգային գիտաժողովն այսօր սկսեց իր աշխատանքները մեկ րոպե լռությամբ՝ ի հիշատակ Հայոց ցեղասպանության զոհերի։
«Լրանում է Հայոց Մեծ եղեռնի 95–ամյա տարելիցը, դար է գլորվել, սակայն հայոց վիշտն այնքան մեծ է, ցավն այնքան սոսկալի է, որ հայ ժողովուրդն իր բաց վերքը մորմոքում է, կանգնած է իր Հայ դատի դիրքերում և պահանջատեր է այս ամեն ինչին»,– իր ելույթում ասաց սփյուռքի նախարար Հրանուշ Հակոբյանը։
Նա նշեց, որ համայն հայ ժողովուրդը՝ Հայաստանում թե Սփյուռքում, միակամ պայքարում է Ցեղասպանության վերջնական ճանաչման համար։ Ըստ նրա՝ դրա մասին են վկայում ՀՀ նախագահի ելույթները Լոնդոնում, Դեյր Զորում և Վաշինգտոնում։
«Մենք վստահ ենք, որ Ցեղասպանության ճանաչման հաղթարշավը, միևնույն է, վերջնական արդյունքի է հասնելու»,– ասաց նախարարը՝ հավելելով, որ ազգային մշակութային արժեքների ոչնչացումը նույնպես Ցեղասպանություն է։
Նշենք, որ միջազգային գիտաժողովը կազմակերպել է Հայոց ցեղասպանության թանգարան–ինստիտուտը՝ Սփյուռքի նախարարության և ԳԱԱ–ի աջակցությամբ։
Studio One