Ford-ը վտանգավոր նստատեղերի պատճառով 33 հազ. մեքենա հետ կկանչի

14:16 • 26.04.10

Ford Motor Co ընկերությունը հետ կկանչի 2010թ. արտադրության մի քանի մոդելների 33 256 մեքենաներ այն պատճառով, որ առջևի նստատեղերի թեքման մեխանիզմը ուղևորներին կարող է վնասվածքներ պատճառել վթարի դեպքում։ Ինչպես հաղորդում է Reuters-ը, այդ մասին ընկերությունը տեղեկացրել է ԱՄՆ ճանապարհային երթևեկության անվտանգության վարչությանը։

Ford-ը նաև նշել է, որ առայժմ տեղեկություններ չունի մեխանիզմի անսարքության հետևանքով պատճառված վնասվածքների մասին։
Նշենք, որ այս ամենը վերաբերում է 2010թ. որոշ Ford Fusion-ներին, Mercury Milan սեդաններին, որոնք արտադրվել են դեկտեմբերի 11-ից մինչև փետրվարի 3-ը Մեքսիկայում, ինչպես նաև Ford Explorer և Mercury Mountaineer ջիփերին, որոնք արտադրվել են դեկտեմբերի 15-ից մինչև փետրվարի 3-ը Կենտուկի նահանգում։