ABBYY Lingvo-ն՝ հայերեն-անգլերեն, հայերեն-ֆրանսերեն և հակառակ տարբերակներով արդեն հասանելի է

ՎիվաՍել-ՄՏՍ-ի և ABBYY ընկերության բացառիկ համագործակցության շնորհիվ, հանրահայտ «ABBYY Lingvo x5» էլեկտրոնային բառարանը համալրվել է նաև հայերեն-անգլերեն, անգլերեն-հայերեն, ինչպես նաև հայերեն-ֆրանսերեն և ֆրանսերեն-հայերեն բառարաններով:

Այսօր ՎիվաՍել-ՄՏՍ-ում կազմակերպված համատեղ ասուլիսի ընթացքում այդ համագործակցության մանրամասները ներկայացրել են ՎիվաՍել-ՄՏՍ-ի գլխավոր տնօրեն Ռալֆ Յիրիկյանն ու ABBYY ընկերության փոխնախագահ Արամ Փախչանյանը:

Վաճառքի պաշտոնական մեկնարկի օրվանից սկսած` մեկ տարվա ընթացքում «ABBYY Lingvo x5 հայերեն» DVD սկավառակը վաճառվելու է բացառապես ՎիվաՍել-ՄՏՍ ընկերության մի շարք սպասարկման կենտրոններում:

«ABBYY Lingvo x5 հայերեն» բազմալեզու բառարանը հարմար է հատկապես նրանց, ովքեր ուսումնասիրում են եվրոպական լեզուներ` անգլերեն, ֆրանսերեն, ռուսերեն, գերմաներեն, իտալերեն, իսպաներեն, պորտուգալերեն, հունարեն և ֆիններեն:

«ABBYY Lingvo x5 հայերեն» բառարանի առաջարկվող տարբերակում ընդգրկված հայերեն-անգլերեն, անգլերեն-հայերեն ինչպես նաև հայերեն-ֆրանսերեն և ֆրանսերեն-հայերեն բառարաններն արտահայտում են այդ լեզուների ժամանակակից օգտագործման հիմնական նրբությունները:

«ՎիվաՍել-ՄՏՍ-ը հերթական անգամ իր հաճախորդներին բացառիկ հիմունքներով առաջարկում է ամենանորարարական ապրանքներն ու ծառայությունները: AABBY ընկերության հետ մեր համագործակցության շնորհիվ` հայախոսները նույնպես կկարողանան այս էլեկտրոնային բառարանի միջոցով ուսումնասիրել օտար լեզուներ»,- նշել է ՎիվաՍել-ՄՏՍ-ի գլխավոր տնօրեն Ռալֆ Յիրիկյանը:

«ABBYY Lingvo x5 հայերեն» բառարանի արժեքը կազմում է 17000 դրամ: