Microsoft-ը կասկածվում է օտարերկրյա պաշտոնյաներին կաշառելու մեջ

ԱՄՆ-ի իշխանությունները հետաքննություն են սկսել համակարգչային ոլորտի հսկա Microsoft ընկերության դեմ, որը կասկածվում է Չինաստանի, Ռումինիայի և Իտալիայի կառավարությունների ներկայացուցիչներին շահավետ պայմանագրեր ստանալու նպատակով կաշառք բաժանելու մեջ, այս մասին տեղեկացնում է ИТАР-ТАСС-ը՝ հղում կատարելով The Wall Street Journal-ին։

Պարբերականի ունեցած տվյալների համաձայն, ներկայում հետաքննությունը վարում են ԱՄՆ արդարադատության նախարարությունն ու ԱՄՆ-ի արժեթղթերի և բորսաների հանձնաժողովը։

The Wall Street Journal-ը նշում է, որ Microsoft-ի նախկին աշխատակիցը հետաքննիչներին հայտնել է, որ 2012թ. իր գործընկերներից մեկն  իրեն հանձնարարել է Չինաստանում «ատկատ» տալ տեղի չինովնիկներին՝ դրա փոխարենը ստանալով շահավետ պայմանագրեր։

Սրան ի պատասխան՝ Microsoft-ի փոխնախագահ Ջոն Ֆրենկը հայտարարել է.«Ինչպես և մյուսը ընկերությունների պարագայում, մեր դեպքում ևս ժամանակ առ ժամանակ նման գործողություններ են իրականցվում, մեղադրանքներ են առաջադրվում։ Նման  դեպքերում մենք միշտ համագործակցում ենք իշխանությունների հետ, օգնում հետաքննությանը»։