Samsung-ը սկսում է Galaxy S IV սմարթֆոնի վաճառքը

Carphone Warehouse դիստրիբյուտորը սկսել է Samsung Galaxy S IV սմարթֆոնների նախնական պատվերների  ընդունումը, իսկ առաջին 2 հազար պատվիրատուները որպես նվեր կստանան Galaxy Tab 2 7.0. պլանշետ, հայտնում է vestifinance.ru-ն։ 

Բացի այդ, բոլոր պատվիրատուները կստանան աքսեսուարների հավաքածու՝ ավտոմեքենայում լիցքավորման սարք, պաշտպանիչ պատյան և էկրանի պաշտպանություն։

Վաճառքի մեկնարկին պատրաստվում են նաև ԱՄՆ-ում. Galaxy S IV-ի արժեքը սկսվում է 250 դոլարից։ Այդ արժեքով սմարթֆոնը կարելի է գնել ամերիկյան բջջային օպերատորներից մեկից՝ երկու տարվա պայմանագրով։ Նորույթի նախնական պատվերները, ըստ NBC-ի տվյալների, կընդունվեն ապրիլի 16-ից։

Ավելի վաղ հարավկորեական ընկերության պաշտոնական ներկայացուցիչները հայտնել էին, որ վաճառքները կսկսվեն ապրիլին՝ միանգամից 155 երկրում։

Samsung-ը դեռ չի հասցրել սկսել իր նորույթի վաճառքը, երբ արդեն հայտնի են դարձել Galaxy S IV mini սմարթֆոնի մանրամասները, որը համարվում է Galaxy S IV-ի փոքր տարբերակը։

Galaxy S IV mini մոդելը համալրված է 960х540 պիքսել լուծմամբ 4.3 դյույմանոց էկրանով, երբ դրա «մեծ» տարբերակն ունի 5 դյույմանոց էկրան՝ 1920x1080 պիքսել լուծմամբ։ Այն ունի երկմիջուկ պրոցեսոր։ Ըստ նախնական տեղեկությունների՝ այն կներկայացվի ամռանը։