«Դ!ԵՄ ԵՄ»–ի ակցիայի մասնակիցների հետ հանդիպեց նախկին վարչապետ Տիգրան Սարգսյանը (տեսանյութեր)
16.17
Այսօրվա ակցիան ավարտվեց: Ակցիայի կազմակերպիչները հավաքվածներին կոչ արեցին ապրիլի 12-ին մեկ մարդու նման ներկա լինել Մատենադարանի մոտ կազմակերպվելիք ակցիային:
16.15
«Դ!ԵՄ ԵՄ»–ի անդամ Դավիթ Մանուկյանը «Ազատություն» ռադիոկայանի հետ զրույցում ասաց, որ սա նախազգուշացման քայլ է: «Եթե խելամիտ լինեն՝ վաղվա նիստում այս հարցին լուծում կտան, եթե ոչ՝ մենք ապրիլի 12-ին հավաք ունենք, խոստանում ենք, որ եռակի և քառակի ավելանալու է մեր շարժումը: Ցավալի է, որ պետք է պայքարես երկրում դատարանի որոշումը կյանքի կոչելու համար»,-ասաց նա:
16.06
Քաղաքացիներից Արսեն Դավթյանին ոստիկանները բերման են ենթարկել: Ակցիայի մասնակիցները մոտեցան Երևանի ոստիկանապետին, ով հաղորդեց, որ բաց են թողնում բերման ենթարկվածին:
Ակցիայի մասնակիցները դուրս են գալիս փողոցի երթևեկելի մասից:
16.02
Ակցիայի կազմակերպիչները հայտարարեցին, թե ոստիկանները մոտեցել և ասել են, թե իրենց համբերության բաժակը կարող է լցվել:
«Քանի որ մենք են տերը մեր երկրի, մեր համբերությունն անտակ է: Հայտարարում ենք, որ մեր ակցիայով ևս մեկ քար ենք դնում մեր հանրապետության կառուցման գործում և մինչև վերջ զբաղվելու ենք աղբահանության գործով»,-ասաց ակցիայի մասնակիցներից մեկը:
15.59
«Դ!ԵՄ ԵՄ»–ի անդամ Դավիթ Մանուկյանն ասաց, թե Տիգրան Սարգսյանի կոչն իրենք ընդունում են որպես նախկին վարչապետի կոչ: «Նա մեզ հրավիրում է երկխոսելու Սահմանադրական դատարանի որոշման շուրջ, սակայն չի կարելի երկխոսել ՍԴ որոշման շուրջ»,-ասաց Դավիթ Մանուկյանը՝ կառավարության անդամներին կոչ անելով խելամիտ գտնվել և վաղվա նիստում հարցին լուծում տալ:
15.55
«Եթե ուզում եք ձեր բարձրացրած հարցի պատասխանը լսեք, ապա իրավասու մարդիկ պետք է լսեն ձեր հարցը և տան պատասխան: Հիմա դուք ունեք բացառիկ հնարավորություն, և ևս մեկ անգամ ձեզ հրավիրում եմ երկխոսության, քանի որ նման հարցերը փողոցում չեն քննարկում: Դուք խախտում եք այլ անձանց իրավունքները՝ պայքարելով ձեր իրավունքների համար: Ցանկացած պահի, երբ պատրաստ լինեք համագործակցելու, մենք էլ ենք պատրաստ: Հաջողություն ձեզ»,- ասաց Տիգրան Սարգսյանն ու հեռացավ:
15.32
«Դ!ԵՄ ԵՄ»–ի բողոքի ակցիայի մասնակիցների հետ հանդիպման է եկել նախկին վարչապետ Տիգրան Սարգսյանը, ով վերջիններիս ասաց, որ աշխատանքային խումբ ձևավորեն և բարձրանան ֆինանսների նախարարություն քննարկելու իրենց հուզող բոլոր հարցերը:
Ակցիայի մասնակիցները իրենց աղմուկով իրենց դժգոհությունն արտահայտեցին Տիգրան Սարգսյանի կոչին:
15.24
Ակցիայի մասնակից Գևորգ Գորգիսյանը հայտարարեց, որ իրենք այլևս ոչինչ չեն խոսելու, երկխոսության չեն գնալու որևէ մեկի հետ, մինչև Դավիթ Սարգսյանը չիջնի և չխոստանա, որ մինչև ապրիլի 12-ը էլեկտրոնային հաշվետվություններ ներկայացնելու համար ստեղծված համակարգում կանջատվի կուտակային կենսաթոշակայինի համար գանձվող գումարի ինքնաշխատ համակարգը:
«Պետք է հնարավորություն տալ, որպեսզի գործատուները կարողանան պաշտպանել իրենց աշխատողների իրավունքները»,- ասաց նա:
Ակտիվիստներից Դավիթ Մանուկյանն էլ նշեց, որ եթե իրենց պահանջները չբավարարվեն, իրենք ավելի անկանխատեսելի կլինեն։
«Մեկ ժամ ժամանակ ենք տվել, որ նախարարությունը հայտարարություն տարածի և հայտարարի, որ վաղը Կառավարության նիստի ժամանակ բարձրացված այս հարցերը և կամուրջ հաշիվներից գումարները հետ վերադարձնելու մեխանիզմների մշակումը լուծվելու է»,- ասաց նա:
Իսկ թե ինչ է սպասվում մեկ ժամ հետո, Դավիթ Մանուկյանը նշեց, որ հայտնի չէ:
15.02
Ոստիկանությունն զգուշացնում է, որ ակտիվիստների պահվածքը հակաօրինական է և անհրաժեշտ է ճանապարհը բացել: Ակտիվիստներն էլ իրենց հերթին վանկարկում են՝ «նա–խա–րար, ի–ջիր»։
«Ժողովուրդը ուրեմն այդքան հարգանք չունի՞, որ նախարարը բարեհաճի իջնել ներքև»,-ասաց ակտիվիստներից մեկը:
15.00
Հանրապետության հրապարակ են բերվել մոտ մեկ տասնյակից ավելի ոստիկանական ավտոմեքենաներ։
14.51
Ակցիայի մասնակիցների հետ հանդիպման է իջել Ֆինանսների նախարարության աշխատակազմի ղեկավար Կարեն Թամազյանը, ով նշեց, որ նախարարի պաշտոնակատար Դավիթ Սարգսյանը պատրաստ է ընդունել նրանց պատվիրականությանը, սակայն նրա այս խոսքին անմիջապես մերժեցին և սկսեցին սուլել։
Նրանք պահանջեցին վերջինիցս, որ նախարարի պաշտոնակատարը կա՛մ ինքն իջնի կա՛մ բոլոր ներկայացուցիչները բարձրանան:
14.45
Երևանի ոստիկանապետը ցուցարարներին հորդորեց ընտրել 10 հոգուց կազմված պատվիրակության և բարձրանալ նախարարի մոտ:
«Ճանապարհը պետք է բացեք, չի կարող փակ մնալ: Չենք ուզում ձեզ հետ գնալ ընդհարման: Դուք նախարարին ուզում եք ձեր պահանջները ներկայացնել, բայց հիմա կամայականություն եք դրսևորում»,-ասաց նա:
Ի պատասխան ցուցարարները նշեցին, որ ճանապարհը փակելը իրենց բողոքը արտահայտելու ձևն է, ինչը օրենքով չի արգելվում:
«Եթե Դավիթ Սարգսյանը ստորագրի, որ մեր պահանջները բավարարում է նույն պահին կբացենք ճանապարհը»,-ասացին ակտիվիստները:
14.37
Ակտիվիստներին է մոտեցել Երևանի ոստիկանապետ Աշոտ Կարապետյանը, ով փորձում է համոզել ակտիվիստներին դուրս գալ և բացել փողոցը: «Հիմա առաջարկում եմ դուրս գաք ճանապարհից, իրար հետ գնանք նախարարություն: Եթե չգան, չիջնեն, ես էլ ձեզ հետ միասին կգամ էստեղ: Ես պարտավոր եմ զգուշացնել, որ պետք չէ օրենքը խախտել, եկեք բոլորս միասին, ես ձեզ հետ միասին կգնամ Ֆինանսների նախարարություն»,- ասաց նա:
Ակտիվիստները չեն համաձայնում բացել ճանապարհը և Երևանի ոստիկանապետի հետ գնալ նախարարություն:
14.29
Ակցիայի մասնակիցներին են միանում պատահական անցորդներ։ Ցուցարարները սպասում են, որ կառավարությունից ինչ–որ մեկը կմոտենա իրենց և կլսի իրենց պահանջը։
14.15
Հանրապետության հրապարակ է եկել Երևանի փոխոստիկանապետ Վալերի Օսիպյանը, ով բանակցում է ակցիայի մասնակիցների և կազմակերպիչների հետ՝ փորձելով նրանց համոզել, որպեսզի բացեն ավտոճանապարհը։ Նա ասաց, որ ակցիայի մասնակիցների քայլերն անօրինական են, ինչին ի պատասխան «Դ!ԵՄ ԵՄ»–ի անդամ Դավիթ Մանուկյանն ասաց, որ իրենց գործողությունները լիովին համապատասխանում են Սահմանադրությանը, քանի որ ՍԴ–ն իրենց պահանջները ճանաչել է սահմանադրական։
14.10
Նստած ցուցարարներին մոտեցավ «կարմիր բերետավորների» բերող ոստիկանական ավտոմեքենան։
13.59
Ակցիայի մասնակիցները ճանապարհի երկայքնով նստել են կառավարության շենքի դիմաց՝ Նալբանդյան փողոցի մեջտեղում, ինչի հետևանքով երթևեկությունը դադարել է:
13.50
Ակցիայի կազմակերպիչներից միայն երկուսին հաջողվեց ներս մտնել նախարարություն և հանձնել իրենց դիմում–նամակները։ Նախարարությունից նրանց հետ խոսել է միայն աշխատակազմի ղեկավարը։
Ակցիայի մասնակիցներն այս պահին արդեն երթով շարժվում են դեպի Պետեկամուտների կոմիտե։
13.35
Նախարարության մոտ հրմշտոց է սկսվել այն բանից հետո, երբ նախաձեռնության անդամները հայտարարեցին, որ ուզում են նամակ հանձնեն նախարարին և խնդրեցին ապահովել հանձնելու գործընթացը, սակայն երբ նրանք մոտեցան մուտքին, ոստիկանները փակեցին այն, թույլ չտալով մոտենալ դռանը, ինչի արդյունքում էլ առաջացավ հրմշտոց: Նրանք տասը րոպե ժամանակ էին տվել նախարարին իջնելու և իրենց հարցերին պատասխանելու համար:
13.20
Ակցիայի մասնակիցները հայտարարեցին, որ Ֆինանսների նախարարությանը 10 րոպե ժամանակ են տալիս, որպեսզի պատասխանեն, թե արդյո՞ք կատարում են իրենց պահանջները` հակառակ դեպքում սպառնալով մտնել նախարարության շենք։
13.13
«Դ!ԵՄ ԵՄ» նախաձեռնության անդամները Ֆինասների նախարարության դիմաց հայտարարեցին, որ պահանջում են իրենց պատասխանել, թե ՊԵԿ-ի համակարգից պարտադիր վճարման ինքնաշխատ կետը ե՞րբ է հեռացվելու: Նրանք նախարարության դիմաց վանկարկում են «պահանջու եմ» և սպասում եմ պատասխանի:
13.07
Ակցիայի մասնակիցներն այս պահին շարժվում են դեպի Ֆիննախի շենքը, որտեղ կհնչեցնեն իրենց պահանջները։
13.00
Ակցիայի կազմակերպիչներից մեկն իր ելույթում ասաց, որ երբ մի քիչ ճնշում գործադրեցին, իշխանություններն սկսեցին նկատել օրենքում առկա թերությունները։ Հիմա ՍԴ–ն հակասահմանադրական ճանաչեց այս օրենքի դրույթները։
Ակցիայի մասնակիցները վանկարկում ենք՝ ար–դա–րու–թյուն
12.55
Ակցիայի կազմակերպիչներից մեկը բարձրախոսով հայտարարեց, թե որն է իրենց պահանջը և մասնակիցների հետ միասին վանկարկեցին «ան–վա–վեր»՝ նկատի ունենալով Սահմանադրական դատարանի որոշումը, որով հակասահմանադրական և անվավեր էին ճանաչվել «Կուտակային կենսաթոշակների մասին» ՀՀ օրենքում կատարվելիք փոփոխությունների մեծ մասը։
Պարտադիր կուտակային կենսաթոշակային համակարգի դեմ պայքարող «Դ!ԵՄ ԵՄ» քաղաքացիական նախաձեռնություն այսօր կազմակերպել է երթ՝ ՀՀ ֆինանսների նախարարությունից դեպի ՀՀ Պետական եկամուտների կոմիտե:
Մինչ այդ «Դ!ԵՄ ԵՄ» թիմը երթի իրազեկման մասին հաղորդագրություն էր տարածել, որտեղ ասվում է. «Սահմանադրական դատարանի ապրիլի 2 թիվ ՍԴՈ-1142 որոշման հրապարակումից հետո ՀՀ Պետական եկամուտների կոմիտեն շարունակում է էլեկտրոնային հաշվետվությունների ձևը անփոփոխ թողնել և դրանով պարտադրել գործատուներին փոխանցել կուտակային վճարները՝ սպառնալով ենթարկել վարչական պատասխանատվության:
Մենք պետք է ստիպենք ՀՀ Պետական եկամուտների կոմիտեին ենթարկվել ՀՀ Բարձրագույն դատարանի վերը նշված որոշման պահանջներին և անհապաղ համապատասխան փոփոխություններ կատարել էլեկտրոնային հաշվետվությունների ներկայացման ձևում՝ հնարավորություն տալով գործատուներին իրենց աշխատակիցների կամքին հակառակ պարտադիր կուտակային վճարներ չկատարել:
Մեր հաղթական պայքարը շարունակվում է․․․»:
Ուղիղ միացումը՝ Azatutyun.am–ի










