Մալայզիական կորած օդանավի որոնման գոտին կրկին կրճատվել է

10:33 • 10.04.14

Մալայզիական կորած Boeing ինքնաթիռի որոնողական միջազգային գործողության մասնակիցները հինգշաբթի նորից նվազեցրել են որոնման գոտին Հնդկական օվկիանոսում, հայտնում է ԻՏԱՌ ՏԱՍՍ-ը:

 

Որոնման 75,4 հազար կմ/ք-ն հասցվել է 57,9 հազար կմ/ք-ի: Դա հնարավոր է դարձել նորից ազդանշաններ որսալուց հետո, որոնք օվկիանոսի հատակից հաղորդում է օդանավի ենթադրյալ «սև արկղը»:

 

Միացյալ որոնողական համակարգման կենտրոնից հայտնել են, որ համոզված են՝ որոնման կոորդինատները ճշգրիտ են, սակայն համոզվելու համար հարկավոր է սեփական աչքով տեսնել բեկորները: Մասնագետներն ասել են, որ վստահ են՝ շուտով գտնելու են օդանավը, սակայն խոստովանել են, որ դա բարդ առաջադրանք է:

 

Առաջին անգամ այդ ազդանշաններն արձանագրվել էին անցած շաբաթ Ավստրալիայի արևմտյան ափից 2,2 հազար կմ հեռավորությամբ: Չորեքշաբթի նորից նման ազդանշաններ են արձանագրվել՝ 5 րոպե 25 վայրկյան և 7 րոպե տևողությամբ:

 

Որոնողական թիմը հայտնել է նաև, որ նույն օրը մեծ թվով լողացող օբյեկտներ են նշմարվել ջրի մակերևույթին, որոնք ենթադրաբար օդանավի բեկորներ են:

Այսօր որոնողական հատվածի տարածքում աշխատելու է 14 օդանավ և 13 նավ: Օվկիանոսի խորությունն այդ հատվածում 4,5 հազար մ է:

 

Malaysian Airlines-ին պատկանող Boeing 777-200-ն անհետացել էր մարտի 8-ին։ Դրանում գտնվել է 239 մարդ: