Ռուսներին խորհուրդ են տվել զերծ մնալ 109 երկիր այցելելուց

12:35 • 11.04.14

Ռուսաստանի Դաշնության արտաքին քաղաքական գերատեսչությունը խորհուրդ է տվել իր քաղաքացիներն զերծ մնալ այն երկրներ ճամփորդելուց, որոնք ԱՄՆ-ի հետ փոխադարձ արտահանձնման համաձայնություն ունեն։

 

Ինչպես նշում է utro.ru-ն, ռուսական իշխանությունները մտավախություն ունեն, որ ԱՄՆ-ի կողմից պատժամիջոցների սահմանումից հետո ՌԴ քաղաքացիներին այլ երկրներում ձերբակալելու հավանականությունն աճել է։

 

«ԱՄՆ-ի վարչակարգը, որն անհիմն հրաժարվում է ընդունել Ղրիմի միացման փաստը Ռուսաստանին, փորձում է 3-րդ երկրներում «որս» սկսել ռուս քաղաքացիների նկատմամբ՝ նրանց ԱՄՆ-ին արտահանձնելու և այնտեղ կասկածելի մեղադրանքների հիման վրա դատապարտելու նպատակով»,- նշվում է ՌԴ ԱԳՆ տարածած հայտարարությունում։

 

Աղբյուրը հավելում է, որ ԱՄՆ-ն փոխադարձ արտահանձնման պայմանավորվածություն ունի 109 երկրի հետ, որոնց թվում են Եգիպտոսը, Թուրքիան, Թաիլանդը, Գերմանիան, Հունաստանը, Իսրայելը, Կիպրոսը, Լատվիան, Պորտուգալիան և այլն։

 

Ռուսաստանի դեմ պատժամիջոցներն արևմտյան երկրները սկսել են սահմանել մարտի 16-ին Ղրիմում կայացած պատմական հանրաքվեից հետո։ Մարտի 20-ին ԱՄՆ-ի նախագահ Բարաք Օբաման ընդլայնել է Ռուսաստանի այն քաղաքացիների ցուցակը, որոնց դեմ սահմանվել են այցագրային ու տնտեսական պատժամիջոցներ։ Ցուցակում բացի չինովնիկներից ներառվել են նաև գործարարներ։