ԻՏՁՄ տնօրենը մտավախություն ունի, որ պարտադիր կուտակայինի մասով միջազգային ճնշումը կշարունակվի
Ինֆորմացիոն տեխնոլոգիաների ձեռնարկությունների միության գործադիր տնօրեն Կարեն Վարդանյանը մտավախություն ունի, որ պարտադիր կուտակային կենսաթոշակային համակարգի գործարկման համար կշարունակվեն միջազգային ճմշումները ՀՀ նոր Կառավարության վրա:
«Նախորդ Կառավարության նկատմամբ էլ կար միջազգային ճնշում, այսինքն՝ այս օրինագիծը՝ ֆինանսական դիվերսիան, այնպես չէ, որ իր ծագումնաբանությամբ հայկական էր, սա ակնհայտ միջազգային արժութային հիմնադրամի ճնշման տակ էր արվել: Մեր իշխանություններն էլ որոշակի պարտավորություններ էին վերցրել և չէին կարողանում տակից դուրս գալ»,- Tert.am-ի հետ զրույցում ասաց նա:
Վերջինիս խոսքով՝ նժարների վրա դրվեց հասարակական հանգստությունը և միջազգային ճնշումը, ակնհայտորեն հասարակական հանգստությունը դարձավ ավելի գերակա խնդիր, որն ընտրեց նոր Կառավարությունը. «Բայց ես հույս ունեմ, որ միջազգային ճնշումները չեն շարունակվի, իսկ մենք պետք է կարողանանք ակտիվորեն մասնակցել նոր օրինագծի մշակմանը»:
Կարեն Վարդանյանը նաև նկատեց, որ նորանշանակ վարչապետ Հովիկ Աբրահամյանի՝ պարտադիրի մասով այսօր հրապարակած ելույթից ընդամենը կարելի է քաղել տրամադրություն, որը դրական է: «Այսինքն՝ ելույթը իրավաբանական փաստաթուղթ չէ, այն մեզ ընդամենը՝ ասում է, որ Կառավարությունը հասկացել է, որ նախկին Կառավարությունը հիմարություն է արել, և հիմա ուզում են այդ սխալն ուղղել: Հիմա մենք պետք է մի քիչ համբերությամբ սպասենք և տեսնենք, թե ինչպես են ուղղում այդ սխալը, պետք է սպասենք իրավական փաստաթղթին, որը կամրագրի այդ ելութի իրավական կողմը»,-ասաց նա և ավելացրեց. «Մենք հիմա առավելագույնը՝ կարող ենք ասել, որ ներկայիս Կառավարության տրամադրվածությունը դրական է՝ ելնելով ելույթից, բայց մինչև փաստաթղթեր չլինեն, չենք կարող հստակ բան ասել»:










