Air France ավիաընկերությունը ուղեբեռն այսուհետ կստուգի Փարիզի կենտրոնում
Air France ավիաընկերությունն արդեն երկու օր շարունակ փորձարկում է ուղևորների ուղեբեռի գրանցման նոր համակարգը: Այս մասին հաղորդում է euromag.ru-ն՝ հղում կատարելով Challenges-ին:
Փարիզի Հաշմանդամների տան մոտ գտնվող օդակայանի տերմինալում սկսել են ընդունել այս ուրբաթ և շաբաթ մեկնող ուղևորների ուղեբեռը:
Ինչպես հաղորդում է աղբյուրը՝ազգային ավիափոխադրող ընկերությունն օգոստոսին հանգստի մեկնող ուղևորների հոսքի մեծացման հետ կապված տասնյակ անցակետեր է տեղադրել:
Ուղևորներին անհրաժեշտ է միայն ուղեբեռով հանդերձ ներկայանալ մայրաքաղաքի 7-րդ շրջանի անցակետ՝ նախնական գրանցման համար, ինչը բացարձակապես անվճար է:
Կանխատեսումների համաձայն՝ օգոստոս ամսվա մոտակա հանգստյան օրերին ուղևորների թիվը կհասնի 140.000-ի: Ազգային բեռնափոխադրող ընկերությունը հնարավորություն կտա համապատասխան փաստաթղթերը ձևակերպել թռիչքից առաջ 30 ժամվա ընթացքում:










