«Զվարթնոց» օդանավակայանի հին կառույցի բազրիքի փլուզման պատառները կուսումնասիրվեն առաջիկա օրերին

18:28 • 30.08.14

Շաբաթներ առաջ «Զվարթնոց» օդանավակայանի հին շենքից քարեր թափվելուց հետո քաղաքաշինության նախարարությունը ձևավորեց ճարտարապետներից կազմված աշխատանքային խումբ, որն իր աշխատանքները կսկսի մի քանի օրից: Tert.am-ին հետ զրույցում այս մասին տեղեկացրեց «Հայնախագիծ» ընկերության տնօրեն, ճարտարապետ-շինարար Գրիգոր Ազիզյանը: 

Թեև բուն աշխատանքները դեռ չեն սկսվել, սակայն ճարտարապետն ընդգծեց՝ պարզ է, որ պատճառը շինության նկատմամբ անփույթ վերաբերմունքն է:  



«Ցնակցած բան, որ թողնում ես մնա ու չես շահագործում, չես խնամում, աստիճանաբար փչանում է, ջարդվում ու ընկնում: Դրա օրինակներից մեկն է, եթե հիշում եք, 7-8 տարի առաջ նմանատիպ փլուզում եղավ Հրազդան համալիրում, բայց հետո վերականգնեցին, և այն նույն կերպ շարունակվում է շահագործվել»,-ասաց նա: 

Գրիգոր Ազիզյանը նաև տեղեկացրեց, որ «Զվարթնոցից» թափվել են ո'չ թե քարեր, այլ` բազրիք, ինչը համակարգը կրող էլեմենտ չէ, հետևաբար` սին են այն խոսակցությունները, թե շենքը փլուզման ենթակա է: 

«Շենքին բան չի եղել, մի հատ բազրիք է փլվել, հիմա պետք է հասկանալ պատճառը, կարող է` բրդել-գցել են, կարող է` ինքն իրեն է ընկել, գուցե որևէ մեկը մեքենայով է հարվածել: Քանի դեռ ուսումնասիրությունները չեն սկսվել, ստույգ բան ասել չի լինի»,-ասաց նա: