Պուտինի պլանը չի կանգնեցնի նոր պատժամիջոցները. Մեծ Բրիտանիայի ԱԳՆ

16:07 • 05.09.14

Մեծ Բրիտանիայի արտաքին գործերի նախարար Ֆիլիպ Հեմոնդը հաստատել է Եվրամիության վճռականությունը Ռուսաստանի դեմ նոր պատժամիջոցներ սահմանելու հարցում՝ չնայած Ռուսաստանի նախագահ Վլադիմիր Պուտինի առաջարկած ուկրաինական հակամարտության խաղաղ կարգավորման պլանին, հաղորդում է BBC-ի ռուսական ծառայությունը:

 

Հեմոնդի խոսքով՝ նա Պուտինի խոսքերին «մեծ կասկածամտությամբ» է վերաբերվում:

 

Արևմտյան առաջնորդները վճռական են տրամադրված՝ մեծացնել Ռուսաստանի նախագահի վրա ճնշումը, հավելել է նա:

 

Ֆիլիպ Հեմոնդն ընդգծել է, որ պատժամիջոցները կսահմանվեն՝ չնայած հակամարտության կողմերի հնարավոր պայմանավորվածություններին, սակայն կրակի իրական դադարեցման դեպքում Եվրամիությունը կարող է քննարկել պատժամիջոցները չեղարկելու հարցը:

 

Սպասվում է, որ Ռուսաստանի դեմ նոր պատժամիջոցներ սահմանելու մասին որոշումը կկայացվի ուրբաթ երեկոյան: