Գիտական առումով աբսուրդ են այդ հետազոտությունները, հնարավոր չէ չափել մարդու երջանկությունը. հոգեբան
Այդ կարգի հետազոտությունները ես աբսուրդ եմ համարում մեթոդոլոգիական տեսանկյունից։ Այս մասին Tert.am-ին ասաց հոգեբան Սամվել Խուդոյանը՝ անդրադառնալով բրիտանական «Երեխաների հասարակություն» (The Children's Society) բարեգործական կազմակերպության վերջին ուսումնասիրությանը, ըստ որի՝ Հայաստանի երեխաներն աշխարհում ամենաերջանիկներից են։
«Սարսափելի դժվար է որոշել, թե որ ազգի երեխաներն են ավելի երջանիկ։ Ընդհանրապես, եթե արտակարգ իրավիճակներում չեն հայտնվում, երեխաներն իրենց երջանիկ են զգում։ Գիտական առումով աբսուրդ են այդ հետազոտությունները, հնարավոր չէ չափել մարդու երջանկությունը»,-ասաց նա։
Ինչ վերաբերում է երեխաների նկատմամբ հայ ընտանիքների վերաբերմունքի առանձնահատկություններին՝ Սամվել Խուդոյանն ասաց.«Մենք շատ հոգատար ենք երեխաների նկատմամբ: Երբեմն երեխաների գերխնամքը մեզանում չափազանցված է»։
Հոգեբանը նշեց, որ ծնողները երեխաներին հոգեբանի մոտ են տանում հատկապես կապրիզների, չենթարկվելու, ծնողներին վիրավորելու, դեռահասության տարիքում՝ տնից փախչելու, ալկոհոլ օգտագործելու պատճառներով։










