Սաուդյան թագավորը ցանկանում է քանդել տունը, որտեղ ծնվել է իսլամի մարգարեն
The Independent-ն անդրադարձել է վերջին շրջանում աշխարհի մուսուլմաններին վրդոված Սաուդյան Արաբիայի իշխանությունների պահվածքին:
Այդ երկրի թագավոր Աբդուլլահը ցանկանում է ավերել Մեքքայի այն տունը, որտեղ ըստ ավանդության ծնվել է իսլամի մարգարե Մուհամեդը: Ըստ մամուլի՝ թագավորը ցանկանում է այդ վայրում իր համար նոր պալատ կառուցել՝ Մեքքա ուխտագնացության իր այցերի համար: Սակայն ի սկզբանե նշվել էր, թե տունը կքանդվի՝ մզկիթն ընդլայնելու համար:
Տարբեր մուսուլմանական երկրների լրատվամիջոցներն այս օրերին հիշում են, որ Սաուդյան Արաբիան հարյուրավոր պատմական շինություններ է ավերել մինչ օրս: Այս շարքից ամենավերջինը 500-ամյա սյուների ապամոնտաժումն էր, որոնք տեղադրվել էին ի հիշատակ մարգարեի երկինք առաքվելու:
Պարսից ծոցի ինստիտուտի գնահատմամբ՝ Սաուդյան Արաբիան մինչ օրս հաջողացրել է ոչնչացնել Մեքքայի հազարամյա շինությունների 95 տոկոսը:
Սաուդյան Արաբիայում պաշտոնական կրոնն իսլամի վահաբիստական ուղղությունն է, որում արգելվում է տարբեր վայրերի պաշտամունքը:










