Թուրքիայի հակահայկական կառույցի ղեկավարը դեմ է Հռոմի պապի Թուրքիա այցին՝ Ցեղասպանությունը ճանաչելու պատճառով

17:15 • 14.11.14

Այսպես կոչված՝ «Հայկական անհիմն պնդումների դեմ պայքարի միության» ղեկավար Գյոքսել Գյուլբեյը դեմ է արտահայտվել Հռոմի պապ Ֆրանցիսկոսի՝ Թուրքիա այցին:

 

Ինչպես տեղեկացնում է «Միլլիյեթ» թերթի կայքը, հակահայ գործիչը որպես դեմ լինելու պատճառ նշում է այն, որ Ֆրանցիսկոս պապը 1915թ.-ի դեպքերը համարում է 20-րդ դարի առաջին ցեղասպանություն: 

 

Գյուլբեյը հայտարարել է, թե Պապը հոգևորական է և ավելի լավ է պատմության փոխարեն զբաղվի աշխարհում խաղաղություն հաստատելու առաքելությամբ:

 

«Հոգևոր առաջնորդների կողմից նման թեմաների մասին կարծիք հայտնելը սխալ է: Աշխարհի պատմաբանները դեռ հստակ չեն կողմնորոշվել այդ հարցում, և Հայոց ցեղասպանության մասին Պապի խոսքերը միակողմանի են: Հայկական լոբբին ցեղասպանության պնդումները եկեղեցու և հոգևորականների միջոցով է տարածում»,-ասել է նա:

 

Նա պահանջել է խոչընդոտել նոյեմբերի 30-ին Ֆրանցիսկոս պապի Թուրքիա նախատեսված այցը, ինչպես նաև՝ ներողություն խնդրել թուրք ժողովրդից՝ «սխալ, անհիմն և միակողմանի» խոսքերի համար:

 

Նոյեմբերի 30-ին Հռոմի պապը նախատեսում է այցելել հունական եկեղեցի և, նրանց էլ քրիստոնյա համայնքի զոհեր հաշվելով, աղոթելու է նրանց հոգիների համար:

 

Գյոքսել Գյուլբեյը նշել է, որ իրենց կառույցը Պապին Թուրքիայում տեսնել չի ցանկանում: