Օբաման Ռուսաստանին խորհուրդ է տվել Ուկրաինայի հարցում այլ ճանապարհ ընտրել
ԱՄՆ նախագահ Բարաք Օբաման հայտարարել է, որ հակառուսական պատժամիջոցները կթուլացվեն միայն այն դեպքում, եթե Ռուսաստանը «այլ ճանապարհ ընտրի» Ուկրաինայի արևելքում ընթացող կոնֆլիկտի հարցում։ Այդ մասին նա հայտարարել է G20 վեհաժողովի շրջանակներում Ուկրաինայի իրավիճակի հարցերով ԵՄ երկրների և ԱՄՆ առաջնորդների հանդիպմանը, գրում է lenta.ru-ն:
«Մենք չէինք ցանկանա Ռուսաստանը մեկուսացած տեսնել այնպես, ինչպես այսօր է»,- ասել է Օբաման՝ նշելով, որ ԱՄՆ-ն կնախընտրեր Ռուսաստանը տեսնել «համաշխարհային տնտեսության մեջ ամբողջովին ինտեգրված»:
Սակայն, նրա խոսքերով, ռուսական իշխանությունները շարունակում են աջակցել Ուկրաինայի արևելքում անջատողականներին՝ մասնավորապես «նրանց ծանր սպառազինություն տրամադրելով»:
Բարաք Օբաման ընդգծել է, որ դա խախտում է ինչպես մինսկյան պայմանավորվածությունները, այնպես էլ միջազգային սկզբունքները:
«Այդ սկզբունքներից մեկն այն է, որ ոչ մեկ չի կարող ներխուժել այլ երկիր և փորձել այն քանդել այն ժամանակ, երբ այնտեղ կան ժողովրդավարական ընտրություններ անցկացնելու համար մեխանիզմներ»,- հայտարարել է նա:










