Ձնաբուքը Նյու Յորք նահանգի հյուսիսում 6 մարդու մահվան պատճառ է դարձել (լուսանկարներ)
ԱՄՆ-ում՝ Նյու Յորք նահանգի հյուսիսում, ուժեղ ձնաբուքը վեց մարդու մահվան պատճառ է դարձել, գրում է gazeta.ru-ն՝ հղում անելով ABC News-ին:
Բուֆալո քաղաքի քաղաքապետը ձնաբուքն անվանել է վերջին 40 տարվա ընթացքում ամենաուժեղը:
Ռեկորդային ցածր ջերմաստիճանը և բուքը կաթվածահար են արել նահանգը: Տասնյակ ավտոմեքենաներ արգելափակվել են Բուֆալոյում և Նյու Յորքում, այդ թվում՝ բասկետբոլի կանանց համալսարանական թիմի ավտոբուսը:
Ձնաբքի ընթացքում 20 մարդ թաքնվել է ոստիկանական բաժանմունքում, ևս այդքան մարդ՝ հրշեջ կայանում:
Ձյան շերտի բարձրությունը տեղ- տեղ հասնում է մեկուկես մետրի, այդ պատճառով վթարային ծառայությունները շարժվում են ձնագնացներով: Նյու Յորքի նահանգապետը նահանգում արտակարգ դրության ռեժիմ է հայտարարել:
Ավելի վաղ հաղորդվել է, որ ԱՄՆ հյուսիսային նահանգներում շարունակվող առատ ձյունը գրեթե կաթվածահար է արել ավտոմոբիլային երթևեկությունը Բուֆալո քաղաքում և հանգեցրել է Նյու Յորք նահանգի հիմնական ավտոմայրուղու ավելի քան 200 կմ հատվածի փակմանը:
















