Ուղղաթիռի կործանումը հիշեցում է խաղաղ կարգավորմանն ուղղված ջանքերը կրկնապատկելու անհրաժեշտության մասին. Պետդեպ

11:43 • 20.11.14

Ուղղաթիռի կործանումը հիշեցում է ղարաբաղյան հակամարտության բոլոր կողմերի համար ԼՂ խնդրի խաղաղ կարգավորմանն ուղղված ջանքերը կրկնապատկելու անհրաժեշտության մասին։ Այդ մասին լրագրողների հետ ճեպազրույցի ժամանակ հայտնել է Պետդեպարտամենտի խոսնակ Ջեֆ Ռատկեն՝ խոսելով ղարաբաղյան օդուժի ուղղաթիռի կործանման վերաբերյալ ԱՄՆ դիրքորոշման մասին:

 

«Մենք կարծում ենք, որ դա բոլոր կողմերի համար հիշեցում է Լեռնային Ղարաբաղի հակամարտության խաղաղ կարգավորմանն ուղղված ջանքերը կրկնապատկելու անհրաժեշտության մասին: Ես դրանից բացի այլ բան չունեմ ասելու»,- ասել է Ռատկեն:

 

Անդրադառնալով լրագրողի հնչեցրած այն հարցին, որ ԵԱՀԿ դիտորդները չեն կարողանում այցելել ուղղաթիռի կործանման վայր, նա ասել է, որ ԱՄՆ-ն հասկանում է, որ կարող է ԵԱՀԿ-ի ներկայացուցչին մերժվել այդ վայրին մոտենալու հնարավորությունը և խորհուրդ է տվել դիմել ԵԱՀԿ-ին՝ այլ մանրամասների համար:

 

Հիշեցնենք, որ նոյեմբերի 12-ին ղարաբաղա-ադրբեջանական սահմանի արևելյան հատվածի օդային տարածքում ժամը 13.45-ի սահմաններում ուսումնավարժական թռիչքի ժամանակ ադրբեջանական ԶՈՒ-ի կողմից հրադադարի ռեժիմի խախտման հետևանքով խոցվել է ԼՂՀ ՌՕՈւ ՄԻ-24 ուղղաթիռը:

Ավելի վաղ Մինսկի խմբի համանախագահները հայտարարություն են տարածել, որտեղ լուրջ մտահոգություն են հայտնել շփման գծում ԼՂՀ օդուժի ուղղաթիռի կործանման և վերջին բռնությունների առնչությամբ: Նրանք, մասնավորապես, կոչ են արել խուսափել այնպիսի քայլերից, որոնք կարող են սրել իրավիճակը և հիշեցրել են Հայաստանի և Ադրբեջանի նախագահներին իրենց պատասխանատվության մասին` հարգելու հրադադարը և կատարելու հակամարտության կարգավորման խաղաղ տարբերակ գտնելու իրենց պարտավորությունները: