Եգիպտոսում դեռահաս աղջկան թլպատման հետևանքով սպանած բժշկին արդարացրել են
Եգիպտոսում անմեղ են ճանաչել բժշկին, ով թլպատման է ենթարկել 13-ամյա դեռահաս աղջկա՝ վերջինիս հոր պահանջով, ինչի հետևանքով 2013-ի հունիսին աղջիկը մահացել է, գրում է dw.de-ն։
Դակահլիյա շրջանի դատարանն արդարացրել է Ռասլան Ֆադլին, ով սպանել է 13-ամյա Սոհաիր էլ-Բատեային։
Նախկինում Եգիպտոսի կառավարությունն օրենք է ընդունել, որն արգելում է կանանց թլպատման ավանդույթը, որը վտանգավոր է կանանց առողջության և կյանքի համար, իսկ օրենքն ուժի մեջ է մտել 2008-ից։
Չնայած նրան, որ աղջկա սպանության պատճառն ակնհայտորեն թլպատման հետևանքով առաջացած բարդություններն են եղել, բժիշկը և հայրը, ով սեփական աղջկան բերել էր թլպատման, արդարացվել են։
Բժշկին ներկայացվել էին մի շարք մեղադրանքներ՝ սպանություն անփությության հետևանքով, երեխայի կյանքի վտանգում և թլպատում, սակայն այդ բոլոր կետերով նրան մեղավոր չեն ճանաչել։
Երեխայի հորը ևս մեղավոր չեն ճանաչել երեխայի կյանքը վտանգելու և արգելված թլպատում իրականացնելու համար բժշկի տանելու համար։
Չնայած այդ ամենին՝ բժշկին դատարանը պարտավորեցրել է վճարել 700 դոլար՝ դատական ծախսերի համար։
Թլպատման գործընթացը փոփոխում, խեղման է ենթարկում կանանց արտաքին սեռական օրգանները, խոչընդոտում է միզարձակմանը, ինֆեկցիոն հիվանդությունների վտանգ է առաջացնում, մեծացնում է նորածինների մահվան հավանականությունը, առաջացնում է արյունահոսություն և անգամ՝ մահ:
Կարդացեք նաև՝
ՄԱԿ-ը կոչ է արել հրաժարվել կանանց նվաստացնող ավանդույթներից ու ծեսերից (լուսանկարներ)












