Դավութօղլուի դեմ բողոքող ցուցարարներին թուրք ոստիկաններն արցունքաբեր գազով են ցրել
Թուրքիայի վարչապետ Ահմեթ Դավութօղլուին Թունջելի քաղաքում ցույցերով են դիմավորել:
Ինչպես տեղեկացնում է «Ջումհուրիյեթ» թերթի կայքը, ոստիկաններն արցունքաբեր գազ են կիրառել ցուցարարների դեմ, ինչի հետևանքով տուժել են նաև հարակից դպրոցի աշակերտները:
Դավութօղլուն Թունջելի է հասել ռազմական ուղղաթիռների ուղեկցությամբ և անվտանգության խիստ միջոցառումների պայմաններում:
Մոտ 300 հոգանոց ցուցարարների խումբն ընդդեմ Դավութօղլուի կարգախոսներ է հնչեցրել և ցանկացել է քայլերթ իրականացնել, սակայն հանդիպել է ոստիկանների դիմադրությանը:
Ցուցարարները թույլ չեն տվել Դավութօղլուին մտնել քաղաքապետարանի շենք, ինչից հետո էլ ոստիկաններն արցունքաբեր գազ են կիրառել:
Դրանից հետո ցուցարարները ցրվել են, սակայն որոշ ժամանակ անց դարձյալ հավաքվել են:
Դավութօղլուի անվտանգությունն ապահովել է մոտ 1500 ոստիկան:










