Պուտինը ներգաղթյալներին ժամանակավոր անաշխատունակության նպաստներ տալու օգտին օրենք է ստորագրել
Ռուսաստանի նախագահ Վլադիմիր Պուտինն օրենք է ստորագրել, որն ընդլայնում է այն անձանց շրջանակը, ովքեր ժամանակավոր անաշխատունակության դեպքում ենթակա են պարտադիր սոցիալական ապահովագրության, հայտնել են Կրեմլի մամուլի ծառայությունից, գրում է Interfax.ru-ն։
Ըստ այդմ՝ «Ժամանակավոր անաշխատունակության և մայրության դեպքում պարտադիր սոցիալական ապահովագրության մասին» օրենքում կատարվել են փոփոխություններ։
Օրենքը կվերաբերի ՌԴ տարածքում ժամանակավոր բնակվող օտարերկրյա քաղաքացիներին և ՌԴ քաղաքացիություն չունեցող անձանց այն դեպքում, եթե նրանց գործատուները վճարել են պարտադիր սոցիալական ապահովագրության մուծումներն առնվազն վեց ամիս։
Օրինագիծը Պետդուման ընդունել է նոյեմբերի 21-ին, նոյեմբերի 26-ին այն հաստատել է Դաշնային խորհուրդը։










