ԱՄՆ բազմակի մուտքի վիզայի` 10 տարով տրամադրման քայլն ուղղված է քաղհասարակությանը. Ռուբեն Մեհրաբյան
ՀՀ քաղաքացիների լայն շերտերին 10 տարով ԱՄՆ բազմակի մուտքի վիզայի տրամադրումը մոտավորապես նույնն է, ինչ ԵՄ- Հայաստան վիզաների դյուրացման ռեժիմը, և այն առաջին հերթին` ուղղված է ո´չ թե Հայաստան պետությանը, այլ` Հայաստանի քաղաքացիական հասարակությանը:
Tert.am-ի հետ զրույցում նման կարծիք հայտնեց քաղաքագետ Ռուբեն Մեհրաբյանը` նշելով.«Որպեսզի Ռուսաստանի պրեսինգի տակից կարողանա մասամբ դուրս բերել: Խոսքը վերաբերում է «գաղափարախոսական» , պրոպագանդիստական պրեսինգին, և սա ավելի շատ քայլ է ՝ ընդառաջ քաղաքացիական հասարակությանը, որովհետև, բնականաբար, Ռուսաստանն իր ներքին պրակտիկաները փորձելու է պարտադրել ԵՏՄ բերման ենթարկվող երկրներին և առաջին հերթին ՝Հայաստանին: Ինչո՞ւ , որովհեև մենք լավ գիտենք, որ այդ իմաստով Բելառուսում բետոնած վիճակ է, նույնը Ղազախստանում, ուր ուղղակի անձնիշխանություն է, Հայաստանում քիչ ավելի լիբերալ մոտեցումներ են, ինչը Ռուսաստանը համարում է սպառնալիք իր ներքին համակարգին»:
Հիշեցնենք, որ ՀՀ Կառավարությունը որոշեց, որ 2015-ի հունվարի 1-ից ԱՄՆ քաղաքացիների համար կսահմանվի առանց մուտքի վիզայի այցելությունների ռեժիմ, նախատեսվում է նաև, որ Հայաստանն ու ԱՄՆ-ը կվերջնականացնեն վիզայի ազատականացման գործընթացը ՀՀ լայն շերտերի համար` տասը տարվա բազմակի մուտքի վիզա սահմանելով:
Այս համատեքստում Ռուբեն Մեհրաբյանը առաջարկեց հիշել ԱՄն պետքարտուղարության խոսնակ Ջենիֆեր Պսակիի` մի քանի օր առաջվա հայտարարությունը, որ Հայաստանի անդամակցությունը Եվրասիական միությանը չի փոփոխում ԱՄՆ-ի քաղաքականությունը Հայաստանի և հայ–ամերիկյան կապերի նկատմամբ:
«Այսինքն՝ ԱՄՆ միտք չունի կրճատելու, նվազեցնելու կամ խզելու դրանք: Ավելին՝ դրան հետևեց վիզաների դյուրացման այդ որոշումը, որը ես գոնե հասկանում եմ այնպես, որ Միացյալ Նահանգների կառավարությունը փորձում է Հայաստանի հանրության համար հեշտացնել կապերը ԱՄՆ-ի հետ»,-նկատեց Ռուբեն Մեհրաբյանը:
Հիշեցենք, որ ՀՀ արդարադատության նախարարության կողմից անսպասելիորեն շրջանառության մեջ է դրվել «Հասարակական կազմակեպությունների մասին» օրենքը, որը ՀՀ իրավապաշտպանների գնահատմամբ` պարունակում է անընդունելի կետեր՝ այն դեպքում, երբ դրանից առաջ քննարկվում էր շատ ավելի դեմոկրատական նախագիծ:
Ռուբեն Մեհրաբյանն առաջարկում է, որպեսզի Հայաստանի քաղաքացիական հասարակությունը ուղղակի դիմակայի նման նախագծերին ու որոշումներին, ոչ մի փոխզիջման չգնա:










