SWIFT համակարգում հասանելիության սահմանափակման դեպքում ՌԴ-ի արձագանքն անսահմանափակ կլինի. Դմիտրի Մեդվեդև

ՌԴ վարչապետ Դմիտրի Մեդվեդևը հայտարարել է, որ SWIFT (Համաշխարհային միջբանկային ֆինանսական հեռահաղորդակցության միություն) համակարգին Ռուսաստանի հասանելիությունը սահմանափակելու մասին որոշում կայացվելու դեպքում երկրի արձագանքը առանց սահմանափակումների կլինի:

«Հերթական անգամ սկսել են քննարկումներ անել այսպես կոչված` SWIFT սպասարկման վճարների համակարգի հասանելիության թեմայով: Նման որոշումների կայացման դեպքում, իհարկե, կցանկանայի նշել, որ մեր տնտեսական պատասխանը և, առհասարակ, ցանկացած այլ արձագանք առանց սահմանափակումների կլինի»,- Kommersant.ru-ն մեջբերում է Մեդվեդևի խոսքը:

Ռուսաստանի և Արևմուտքի երկրների փոխադարձ պատժամիջոցների ժամանակ առաջարկներ էին հնչում ՌԴ բանկերը SWIFT համակարգից անջատելու մասին: Սեպտեմբերի կեսերին «Ազգային վճարային խորհուրդ» ոչ կոմերցիոն գործընկերությունը  առաջարկել էր ստեղծել ռուսական նմանատիպ համակարգ` նոր իրավաբանական անձի տեսքով, որն ամբողջությամբ կպատկանի Ռուսաստանի բանկին: