Apple ընկերությունը հայտարարել է մարտի 9-ին կայանալիք շնորհանդեսի մասին

Apple ընկերությունը հայտարարել է մարտի 9-ին Սան Ֆրանցիսկոյում կայանալիք «հատուկ շնորհանդեսի» մասին, որտեղ սպասվում է նոր արտադրանքի ցուցադրություն։ Մասնագետներն այժմ փորձում են գուշակել, թե հատկապես ինչ նորույթ է պատրաստել ընկերությունը, գրում է hitech.newsru.com-ը։

«Վառ գույներով արված հրավերում պարզապես մի բան է նշված, սակայն դա շատ բազմանշանակ արտահայտություն է՝ Spring Forward, որը կարելի է հասկանալ որպես «Գարնանն ընդառաջ» կամ «Ցատկ առաջ»»,- ասել է Լոս Անջելեսում ներդրողներից մեկը, ով ստացել է նման նամակ։

Շնորհանդեսը կկայանա Յերբա Բուենայի արվեստների կենտրոնում և կսկսվի տեղական ժամանակով առավոտյան ժամը 10-ին։

Մի շարք փորձագետներ ենթադրում են, որ Apple-ը կներկայացնի ինտերակտիվ Apple Watch ժամացույցը։

2010-ից սկսած՝ ընկերությունը շուկա դուրս չի եկել բոլորովին նոր արտադրանքով։ Հենց այդ պատճառով էլ շատերը սենսացիա են ակնկալում նոր շնորհանդեսից։

Այլ վերլուծաբաններ կարծում են, որ Apple-ը կցուցադրի MacBook Air համակարգչի նոր տարբերակը։ Մյուս մասը չի բացառում, որ մարտի 9-ին կկայանա iPad Pro պլանշետի շնորհանդեսը, իսկ, հնարավոր է, կներկայացվի ամենասպասված Apple TV հեռուստացույցը։