ՀՀԿ-ականները ողջունում են Րաֆֆի Հովհաննիսյանի քրիստոնեական վարքը, բայց կարծում են, որ Ս.Սարգսյանը նրա ներման կարիքը չունի

13:52 • 26.03.15

ԱԺ «Հանրապետական» խմբակցության պատգամավորները   ողջունում են Րաֆֆի Հովհաննիսյանի քրիստոնեական վարքը, որ պատրաստ է պահքի շրջանում ներել Սերժ Սարգսյանին, բայց կարծում են, որ ՀՀ նախագահը նրա ներման կարիքը չունի:


ԱԺ պետական իրավական հարցերի մշտական  հանձնաժողովի նախագահ Հովհաննես Սահակյանը, ում Tert.am-ը խնդրել էր մեկնաբանել «Ժառանգություն» կուսակցության ղեկավար Րաֆֆի Հովհաննիսյանի երեկվա հայտարարությունը, որ հիմա մեծ պահքի շրջան է և ինքը ներում է ՀՀ նախագահ Սերժ Սարգսյանի մեղքերը` 2012-ին իր  քվեները գողանալու համար, ասաց. «Րաֆֆի Հովհաննիսյանը սկսել է աղոթե՞լ, հավատացյալ մարդ է, չգիտի՞, որ Աստված է ներում բոլորիս մեղքերը,  թող Աստվա՛ծ  ների բոլորիս մեղքերը»:
 

Հանրապետական Կարեն Ավագյանը նկատեց. «Եթե Րաֆֆի Հովհաննիսյանին պահքի շրջանում սկսել է ներողամտությունը խեղդել, ու շատ է ուզում մեկին ներել, ապա կարող է ներել իր կուսակիցներին: Իսկ ավելի գլոբալ բաներն էլ թողնել Աստծուն»:


Իշխող կուսակցության ներկայացուցիչ Մանվել Բադեյանն էլ ասաց, որ լավ է, որ Րաֆֆի Հովհաննիսյանը «քրիստոնեաբար է» մոտենում, «բայց, թե ինչն է ներում Սերժ Սարգսյանին, ինչ է արել Սերժ Սարգսյանը,  չգիտի»: