Լրագրողները դատի են տվել բողոքի ցույցերի «կենտրոն» դարձած Ֆերգյուսոնի ոստիկանությանը

11:24 • 31.03.15

Անցած տարի ամերիկյան Միսուրի նահանգի Ֆերգյուսոն քաղաքում բողոքի ցույցերի ժամանակ բերման ենթարկված չորս լրագրող դատի է տվել Սենթ Լյուիս շրջանի ոստիկանության դեպարտամենտին և ոստիկանության 20 աշխատակցի՝ քաղաքացիական իրավունքները խախտելու և ապօրինի կերպով կալանքի տակ պահելու համար, հաղորդում է ria.ru-ն:

 

Ոստիկանների դեմ դատական հայցը ներկայացվել է երկուշաբթի՝ գերմանական լրատվամիջոցների համար Ֆերգյուսոնում տեղի ունեցող իրադարձությունները լուսաբանող երկու լրագրողների, ինչպես նաև ինտերնետային լրատվամիջոցներից մեկի համար աշխատող երկու ամերիկացիների անունից:

 

Ինչպես նշված է հայցում՝ լրագրողներին բերման ենթարկելը ոստիկանների պահանջը չկատարելու համար անհիմն է եղել և խոսքի ազատության խախտում է:

 

Ֆերգյուսոնում և ԱՄՆ այլ քաղաքներում զանգվածային բողոքի ցույցեր էին տեղի ունեցել, երբ 2014 թվականի օգոստոսին ոստիկան Դարեն Ուիլսոնը սպանել էր աֆրոամերիկացի Մայքլ Բրաունին: