Ոչ թե Սահմանադրությունը, այլ վերնախավի աշխարհընկալումն է մեղավոր, որ երկիրը այսպիսին է. իրավապաշտպան
Իշխող քաղաքական վերնախավի աշխարհայացքն ու քաղաքական կամքի բացակայությունն է պատճառը, որ երկիրն այսպիսին է:
Այս մասին այսօր «Սահմանադրական բարեփոխումների գործընթացը քաղաքացիական հասարակության դիտանկյունից» թեմայով քննարկմանը հայտարարեց «Իրավունքի և ազատության կենտրոնի ղեկավար» ՀԿ նախագահ Վարդան Հարությունյանը և ավելացրեց. «Տվե՛ք ՀՀ իշխանությանը, Ուզբեկստանի, Հյուսիսային Կորեայի, Իրանի, Ադրբեջանի իշխանություններին ամենակատարյալ սահմանադրությունը. նրանք, միևնույն է, կունենան այն երկիրը, որը կա: Սահմանադրությունը չէ, այլ քաղաքական կամքն է, քաղաքական վերնախավի դաստիարակությունն է ու աշխարհընկալումն է մեղավորը, թե ինչու են երկրները այսպիսին»:
Միևնույն ժամանակ Վարդան Հարությունյանը նկատեց, որ սահմանադրական փոփոխություններով չէ, որ իշխանությունը պետք է վերարտադրվի, որովհետև նման ցանկության դեպքում «կարող են վերարտադրվել, ինքնահռչակվել և ինքնահայտարարվել»։
Իսկ թե ինչո՞ւ են այդ դեպքում գնում այդ քայլին. այս հարցի պատասխանը Վարդան Հարությունյանը չունի:
«Համագործակցություն հանուն ժողովրդավարության» ՀԿ-ի նախագահ Ստեփան Դանիելյանն այս հարցի պատասխանը ունի և համամիտ չէ Վարդան Հարությունյանի հետ. «Այստեղ մի նյուանս կա. համակարգը կարող է վերարտադրվել , սակայն անձերը չեն կարող։ Սա է բուն խնդիրը»:
Ի դեպ, Ստեփան Դանիելյանը մինչ այս որոշած է եղել, որ երբեք չի ներքաշվելու սահմանադրական փոփոխությունների վերաբերյալ տեսակետներ հայտնելու մեջ, խոսելու, թե որ տարբերակը՝ նախագահական կառավարման մոդե՞լն է ավելի լավը կամ վատը, քանի որ դա բացարձակ անիմաստ է համարում։
Նա կարծում է, որ հասարակական-քաղաքական քննարկումներում հնչած որևէ տեսակետ չի կարող որևէ ազդեցություն ունենալ նախագծի վերջնական տարբերակի վրա և իշխող վերնախավը կայացնելու է իր որոշումը:
«Եվ երկրորդ, մեզ հայտնի է, թե ընտրությունները և հանրաքվեները ինչ եղանակով են անցնում, իսկ ներքաշվելով՝ լեգիտիմացում ենք այն, ինչ ուզում է անել իշխանությունը»,-ասաց Ստեփան Դանիելյանը:
«Չեք անցկացնի» նախաձեռնության անդամ Արմեն Գրիգորյանն էլ հավելեց, թե շատ սխալ թեզ է շրջանառության մեջ մտել, որ պառլամենտական համակարգն ավելի ժողովրդավարական է, քան նախագահական համակարգը:
«Եթե այդպես լիներ, ապա Հյուսիսային Կորեան ավելի ժողովրդավար կլիներ, քան ԱՄՆ-ը, բայց էդպես չի: Ամեն ինչ կախված է ոչ թե մոդելներից, այլ էն կոմպոնենտներից, որ կան»,-ասաց նա:
Նա հավելեց, որ ավելին` կառավարման մոդելի հետազոտությունները ցույց են տալիս, որ պառլամենտական համակարգն «ավելի վտանգավոր է ավտորիտար ռեժիմն ուժեղացնելու համար», քանի որ եթե նախագահական համակարգի դեպքում անձը ստիպված է լինում երկու ժամկետից հետո հեռանալ, ապա պառլամենտականով հնարավորություններ են ստեղծվում կուսակցության և կուսակցության նախագահի համար՝ մնալ երկարաժամկետ։










