Հավայան կղզիներում շնաձկան հարձակման հետևանքով 65-ամյա կին է մահացել
Հավայան արշիպելագի Մաուի կղզում շնաձկան հարձակման հետևանքով 65 տարեկան կին է մահացել, հայտնում է Fox News-ը:
Անգիտակից կնոջը հայտնաբերել են ափից մոտ 200 մետր հեռավորության վրա: Բժիշկները փորձել են փրկել նրա կյանքը, սակայն՝ ապարդյուն: Նրա ստացած վնասվածքներից բժիշկները եզրակացության են եկել, որ նա հարձակման է ենթարկվել շնաձկան կողմից:
Բնական ռեսուրսների վարչության ղեկավար Կեկոա Կալուհիվան Հոնոլուլուում մամուլի ասուլիսի ժամանակ նշել է, որ միջադեպի առթիվ հետաքննություն է սկսվել: Նա նշել է, որ անձնակազմը հավելյալ նշաններ կտեղադրի ափի երկայնքով:
Ծովափնյա հատվածը, որտեղ տեղի է ունեցել միջադեպը, որոշ ժամանակով փակվել է լողորդների համար:
Սա Հավայան կղզիներում շնաձկան կողմից առաջին մահացու հարձակումն էր այս տարվա ընթացքում:










