Հոնկոնգում հարյուրավոր ոստիկաններ փնտրում են միլիարդատիրոջ թոռնուհուն առևանգած հանցագործներին
Հոնկոնգում խոշոր ոստիկանական գործողություն է սկսվել միլիարդատիրոջ թոռնուհուն առևանգած հանցագործներին գտնելու համար։ Հարյուրավոր ոստիկաններ բլոկպոստեր են կանգնեցրել ճանապարհներին, գործի են դրվել ուղղաթիռներ, 2-րդ օրն է «խուզարկում» են ազգային պուրակներից մեկը, որտեղ, ենթադրաբար, թաքնվել են 6 հանցագործներն անհրաժեշտ գումարը ստանալուց հետո, գրում է ՏԱՍՍ գործակալությունը։
Քննիչները կարծում են, որ հանցագործությունը Չինաստանի ցամաքային հատվածից եկածներ են իրականացրել՝ հատուկ պատվերով։ «Նրանց բռնելն ընդամենը ժամանակի հարց է»,- ասել է իրավապահ մարմինների աղբյուրը։
Ներխուժելով հարուստի առանձնատուն՝ հանցագործներն այնտեղից տարել են գումար, թանկարժեք իրեր և տանտիրուհուն՝ 29-ամյա մի կնոջ։ Ըստ տեղեկությունների՝ նա հայտնի մագնատ Լաու Թին Փոնի՝ Bossini ընկերության հիմնադրի թոռնուհին է։
Ստանալով ընտանիքից 3.6 մլն դոլար՝ հանցագործները բաց են թողել առևանգվածին և հեռացել։
Սա վերջին տարիներին մարդ առևանգելու ամենախոշոր դեպքն է Հոնկոնգում, որը համարվում է հանգիստ քաղաք։










