Գերագույն ռադայի շենքի մոտ մահացածների թիվը հասել է 3-ի

15:02 • 01.09.15

Կիևի կենտրոնական քաղաքային հիվանդանոցում մահացել է երեկ Գերագույն ռադայի շենքի մոտ բախումների ժամանակ վնասվածքներ ստացած երիտասարդը։ Այդ մասին հայտնել է Ուկրաինայի նախագահի խորհրդական, պատգամավոր Օլգա Բոգոմոլեցը։

 

«Խերսոնից 1995 թվականին ծնված տղան ստացել է գլխուղեղի՝ կյանքի հետ անհամատեղելի բեկորային վնասվածքներ։ Խորին ցավակցություններս մահացածի ընտանիքին»,- գրել է նա Facebook-ի իր էջում:

 

Ավելի վաղ հաղորդվել է, որ առավոտյան հիվանդանոցում մահացել է Ազգային գվարդիայի երկրորդ վիրավոր մարտիկը:

 

Օգոստոսի 31-ին ապակենտրոնացման օգտին պատգամավորների քվեարկությունից հետո ցուցարարների և ոստիկանության ու Ազգային գվարդիայի աշխատակիցների միջև բախումներ են սկսվել: Ամբոխից իրավապահների վրա ռումբ են նետել: Ներքին գործերի նախարարության տվյալներով՝ վիրավորվել է ավելի քան 100 ուժային։