Բալիում անվտանգության միջոցառումներն ուժեղացվել են՝ Ջակարտայում ահաբեկչություններից հետո

Ինդոնեզիայի իշխանությունները հինգշաբթի օրն ուժեղացրել են անվտանգության միջոցառումները համաշխարհային ճանաչում ունեցող զբոսաշրջային Բալի կղզում՝ երկրի մայրաքաղաք Ջակարտայում ահաբեկչությունների շարքից հետո։ Այդ մասին հայտարարել է Բալի շրջանի ոստիկանության ղեկավար Սուգենգ Պրիյանտոն, գրում է РИА Новости-ն:

«Ջակարտայում տեղի ունեցածի հետ կապված՝ ես արդեն խորհրդակցություն եմ անցկացրել շրջանի բարձրաստիճան ոստիկանների հետ, ինչպես նաև հրահանգել եմ բոլոր ստորաբաժանումներին ուժեղացնել զգոնությունը»,- ասել է ոստիկանը:

Նրա խոսքով՝ ողջ կղզում նախատեսվում է կենսական կարևոր օբյեկտների ուժեղացված հսկողություն՝ զինվորականների և տեղի իշխանությունների հետ համագործակցությամբ:

Պայթյունների շարքը տեղի է ունեցել հինգշաբթի օրն Ինդոնեզիայի մայրաքաղաքի կենտրոնում Sarinah առևտրի կենտրոնի մոտակայքում: Դրանից հետո այդ թաղամասում, որտեղ նաև գտնվում են հյուրանոցներ, դեսպանատներ և գրասենյակային շենքեր, փոխհրաձգություն է սկսվել ոստիկանների և ահաբեկիչների միջև: Ջակարտայի ոստիկանությունը ձերբակալել է չորս մարդու:

Ջակարտայում ահաբեկչությունների շարքի հետևանքով, վերջին տվյալներով, զոհվել է 17 մարդ: «Իսլամական պետություն» ահաբեկչական խմբավորման գրոհայինները ստանձնել են Ինդոնեզիայի մայրաքաղաք Ջակարտայում պայթյունների շարքի պատասխանատվությունը։