Էկվադորը կհամագործակցի Շվեդիայի հետ Ասանժի գործով

Էկվադորի արտգործնախարար Ռիկարդո Պատինյոն հայտարարել է, որ իր երկիրը կհամագործակցի Շվեդիայի հետ WikiLeaks սկանդալային կայքի հիմնադիր Ջուլիան Ասանժի գործով, մասնավորապես՝ Լոնդոնում Էկվադորի դեսպանատանը նրա հարցաքննության հնարավորության մասին, հաղորդում է РИА Новости-ն:

«Մենք կհամագործակցենք շվեդական արդարադատության հետ, որպեսզի նրանք կարողանան նրանից ցուցմունքներ ստանալ, մենք այդ մասին խոսել ենք ամենասկզբից»,- ասել է Պատինյոն։

Ավելի վաղ Շվեդիայի դատախազությունը դիմել է Լոնդոնում Էկվադորի դեսպանատանը WikiLeaks-ի հիմնադիր Ջուլիան Ասանժի հարցաքննությունն իրականացնելու հարցով։ Դիմումը հնարավոր է դարձել այն բանից հետո, երբ ուժի մեջ է մտել Շվեդիայի և Էկվադորի միջև իրավական համագործակցության վերաբերյալ երկկողմ պայմանագիրը, ինչը թույլ է տալիս հարցաքննել Ասանժին։

Պայմանագիրը ստորագրվել է 2015 թվականի վերջին։

2012 թվականին Ասանժը մտել է Լոնդոնում Էկվադորի դեսպանատուն և դիմել է Էկվադորի իշխանություններին՝ խնդրելով նրան քաղաքական ապաստան տրամադրել մտավախությունների համար, որ շվեդական իշխանությունները նրան կարող են ԱՄՆ արտահանձնել WikiLeaks-ում իր գործունեության պատճառով: Դիմումը ներկայացնելուց ի վեր Ասանժը գտնվում է Էկվադորի դեսպանատանը: