Եղանակն՝ այսօր
Վարշավայում «Հանդիպում Հայաստանի հետ» խորագրով միջոցառում է անցկացվել
Հունվարի 21-ին Վարշավայի Զիգմունտ Յան Ռումելի անվան հանրային գրադարանում տեղի է ունեցել «Հանդիպում Հայաստանի հետ» խորագրով միջոցառում, որը կազմակերպել էին Լեհաստանում ՀՀ դեսպանությունը, Վարշավայի Զիգմունտ Յան Ռումելի անվան հանրային գրադարանը, «Լեհաստան-Արևելք» և «Լեհաստան-Հայաստան» ընկերակցությունները, տեղեկացնում է ՀՀ ԱԳՆ կայքը:
Միջոցառման շրջանակներում Հայաստանին նվիրված ծավալուն ելույթով հանդես են եկել Լեհաստանում ՀՀ դեսպան Էդգար Ղազարյանը: Նա գրադարանի ընթերցողներին ներկայացրել է տեղեկություններ Հայաստանի, Արցախի, հայկական պատմության ու մշակույթի, հայոց լեզվի մասին:
Դեսպանն անդրադարձել է նաև Հայոց ցեղասպանությանը և հայկական Սփյուռքի ձևավորմանը: Առանձին անդրադարձ է կատարվել Լեհաստանի հայ համայնքի և դրա պատմությանը, Լեհաստանի հասարակական կյանքում հայերի ունեցած դերակատարությանը, Լեհաստանի տարբեր քաղաքներում հայկական հուշարձաններին, ինչպես նաև հայ-լեհական բարեկամական հարաբերություններին:
Ելույթից հետո դեսպան Ղազարյանը պատասխանել է միջոցառման մասնակիցներին հուզող բազմաթիվ հարցերի:
Միջոցառման շրջանակներում ցուցադրվել է Հայաստանի մասին տեսաֆիլմ, իսկ Լեհաստանում բնակվող հայ լրագրող «Լեհաստան-Հայաստան» ընկերակցության փոխնախագահ Ռաֆայել Ամիրյանը գրադարանի ընթերցողներին համառոտ կերպով ներկայացրեց տեղեկություններ Հայաստանին և Լեհաստանում ապրող հայերին նվիրված իր նոր գրքի մասին, որը կհրապարակվի առաջիկայում:
Դեսպան Ղազարյանը Հայաստանի, Արցախի, Հայոց ցեղասպանության, ինչպես նաև Լեհաստանի հայ համայնքի մասին պատմող բազմալեզու, այդ թվում լեհերեն, մի շարք գրքեր է նվիրաբերել Յան Ռումելի անվան հանրային գրադարանին:
Studio One