Հռոմի պապը դատապարտել է Ստամբուլի օդանավակայանում տեղի ունեցած ահաբեկչությունը
Հռոմի պապ Ֆրանցիսկոսը դատապարտել է Ստամբուլի օդանավակայանում տեղի ունեցած ահաբեկչությունը, որի հետևանքով, ըստ վերջին տվյալների, զոհվել է 41 մարդ:
«Երեկ երեկոյան Ստամբուլում իրագործվել է անմարդկային ահաբեկչական հարձակում, որի հետևանքով զոհվել ու վնասվածքներ են ստացել բազմաթիվ մարդիկ: Աղոթենք զոհերի, նրանց ընտանիքների անդամների ու թանկագին թուրք ժողովրդի համար»,-ասել է պոնտիֆիկոսը` դիմելով Վատիկանի Սուրբ Պետրոսի տաճարում հավաքված հավատացյալներին:
Ինչպես ավելի վաղ հայտնել էր Tert.am-ը, Ստամբուլում Աթաթուրքի անվան օդանավակայանում հունիսի 28-ին տեղի ունեցած ահաբեկչական հարձակման հետաքննությունը շարունակվում է:
Մի կողմից շարունակվում է զոհերի ինքնության ճանաչման գործընթացը, մյուս կողմից թուրք իրավապահները փորձում են բացահայտել մահապարտների ինքնությունը:
Հաղորդվում է, որ ահաբեկիչները, հավանաբար, օտարերկրյա քաղաքացիներ են: Պայթյունից նրանց մարմինները մասերի են բաժանվել, ինչը դժվարացրել է իրավապահների գործը:
Ավելի վաղ Թուրքիայի վարչապետ Բինալի Յըլդըրըմը հայտարարել էր, որ ահաբեկչության մեջ «Իսլամական պետության» հետքը կա:










