Վերնիսաժում քաղաքացիներին արգելում են առևտուր անել
Այսօր առավոտյան Վերնիսաժում հին շորերի, կենցաղային պարագաների առևտուր իրականացնող անձանց ոստիկանության աշխատակիցներին արգելել են առևտրով զբաղվել:
«Վերնիսաժ» հատվածի վերակառուցման, արդիականացման, կանոնակարգման և բարեկարգման նախագծի շրջանակներում Երևանի քաղաքապետարանը որոշ ժամանակ առաջ հագուստ, կենցաղային պարագաների վաճառքով զբաղվող առևտրականներին տեղեկացրել էր, որ առևտրային այդ տարածքի հատվածը հուլիսի 1-ից չի գործելու:
Առևտուր իրականացնող քաղաքացիներն ասում են, որ քաղաքապետարանն այդ որոշումով իրենց զրկում է հանապազօրյա հաց վաստակելու հնարավորությունից։
«Այս տարածքում վաճառում ենք 200, 300 դրամանոց շորեր` մեր հացի խնդիրը լուծելու համար: Ամբողջ ժողովուրդը պայքարում է 200,300 դրամի համար: Հարգելի պարոն Տարոն Մարգարյան, դուք պետք է հաշվի նստեք այս ժողովրդի կարծիքի հետ: Չի կարելի ժողովրդին սոված թողնել, մեղք ենք, ուր պետք է գնանք այդ 200 դրամը վաստակելու համար»,- ասաց Վերնիսաժի աշխատակիցներից մեկը:
Ինչ վերաբերում է քաղաքի տեսքին, առևտրական կանանցից մեկի խոսքով` իրենք այդ հատվածում առևտուր են իրականացնում շաբաթական երկու անգամ, որը քաղաքի տեսքին չի խանգարում:
«Քսան տարի կանգնել ենք, եկել ու ասում են դուրս եկեք, դուրս չենք գալու, մենք պայքարելու ենք մինչև վերջ: Քսան տարի է այստեղ ենք, ինչպե՞ս կարելի է հանապազօրյա հացից կտրել, չի կարելի, մտածեք աղքատ ժողովրդի մասին»,- ասաց մեկ այլ քաղաքացի:
Նշենք, որ Երևանի քաղաքապետարանից հայտնել են, որ Վերնիսաժի այդ հատվածի վաճառականները կարող են իրենց առևտուրը շարունակել «Հրազդան» տոնավաճառի մոտ, սակայն այդ որոշմանը ևս առևտրականները դեմ են, որովհետև հաճախորդների խնդիր կա:
Բեթղեհեմ Արաբյան










