Ներկայացվել է արևային մարտկոցով աշխատող զբոսանավի նախագիծ (լուսանկարներ)

Շվեդական SAAB մեքենաշինական ընկերության նախկին գլխավոր դիզայներ Էյնար Հարեյդեն արևային մարտկոցով աշխատող զբոսանավի նախագիծ է ներկայացրել, հաղորդում է SuperYachts-ը։

108 մետրանոց նավն ապահովված է լինելու հիբրիդային դիզելային-էլեկտրական ուժային հարմարանքով։ Մարտկոցները լիցքավորվելու են արևային էներգիայով։ Դիզելային շարժիչները կիրառվելու են հեռավոր նավարկությունների ժամանակ, իսկ ափամերձ գոտիներում օգտագործվելու են էլեկտրական շարժիչները։

Զբոսանավի վրա նախատեսված է բուսածածկ կանաչ տարածք և 20 մետր երկարությամբ լողավազան։ Վերին տախտակամածի վրա տեղադրված են լինելու ճաշարանային տարածքներ ու տեսարանային հարթակ։ Զբոսանավն ունենալու է նաև ուղղաթիռների վայրէջքի համար նախատեսված հարթակ։

«Հիբրիդային մեգազբոսանավի այս գաղափարով ուզում ենք կենտրոնացումն էքստրավերտ հիացմունքից տեղափոխել դեպի բնության գեղեցկության ու փոփոխվող տարերքի ակտիվ ընկալման հարթակի ստեղծումը»,- նախագիծը մեկնաբանել է դիզայների ներկայացուցիչը։

Զբոսանավի կառուցման հնարավոր ժամանակահատվածի և նախագծի մոտավոր գնի մասին մանրամասներ չեն հաղորդվում։