Ռուս պատգամավորը հայտարարել է, որ սատանայի կնիքն է տեսնում Քլինթոնի վրա
ՌԴ Պետդումայի պատգամավոր Վիտալի Միլոնովն ԱՄՆ նախագահի դեմոկրատ թեկնածու Հիլարի Քլինթոնին անվանել է կախարդ և նախընտրել «ծերուկ Թրամփին», գրում է lenta.ru-ն:
«Որովհետև Քլինթոնը կախարդ է: Նա ծեր է, ոչ հզոր, նա չի կարող պետություն կառավարել: Նա այդքան էլ խելացի չէ: Եվ, բացի այդ, նրա վրա անեծք կա Զատկի գիշերը Հարավսլավիան ռմբակոծելու համար»,- ասել է Միլոնովը՝ հավելելով, որ նրա վրա տեսնում է սատանայի կնիքը:
Միլոնովի կարծիքով՝ Հանրապետական կուսակցությունից թեկնածու Դոնալդ Թրամփին պետք չէ անլուրջ վերաբերվել, չնայած ամեն ինչ վկայում է այն մասին, որ հաղթանակ է տանելու Քլինթոնը:
Ինչպես ավելի վաղ հայտնել էր Tert.am-ը, այս տարի ռեկորդային թվով ամերիկացիներ են մասնակցել ԱՄՆ նախագահի ընտրությունների վաղաժամ քվեարկությանը:
Հայտնի է, որ վաղաժամ ընտրություններին արդեն քվեարկել է 46.27 մլն մարդ, որոնց թվում իրենց ակտիվությամբ առանձնանում են հատկապես դեմոկրատ Հիլարի Քլինթոնին աջակցող լատինամերիկացիները:










