Սարի թաղի բնակիչները պահանջում են ազատ արձակել իրենց հարազատներին (տեսանյութ)

14:10 • 10.11.16

Կառավարության դիմաց այսօր բողոքի ակցիա էին իրականացնում հուլիսի 19-ին Սարի թաղի գործով կալանավորվածների հարազատները։

Tert.am-ի հետ զրուցում քրեական  գործում  որպես  մեղադրյալ  անցնող Էդուարդ Զեյթունյանի կինը՝ Լալա Բերնացյանը, նշեց, որ իր ամուսնուն այժմ անօրինական են պահում կալանավայրում. «Նրա կալանքը վաղուց պետք է երկարաձգեին, բայց դատական նիստերը չեն կայանում, մեղադրանքը հաստատելու փաստեր էլ չկան, ոստիկանների ցուցմունքների վրա են միայն հենվում»։

Ակցիայի մասնակիցները պահանջում էին վարչապետից հանձնարարել արդարադատության նախարարին՝ հետևել գործի ընթացքին։

«9 տղաների մեղադրանք է առաջադրվել, նրանց սպառնում  է 5-10 տարի ազատազրկում, բայց ոստիկանները ընդամենը թեթև քերծվածքներ են ունեցել  միջադեպի հետևանքով, մեր տղաները հանցագործ չեն, գազի, ջրի ճանապարհի խնդրով էին  խոսում ոստիկանների հետ, որից հետո միջադեպ եղավ»,- նշեց քրեական գործով անցնող Հրաչյա Բոյաջյանի կինը՝ Նարինե Ղազարյանը։