Դոնալդ Թրամփի ընտրվելուց հետո Սնոուդենը չի վախենում ԱՄՆ արտահանձնումից
ԱՄՆ Կենտրոնական հետախուզական վարչության նախկին աշխատակից Էդվարդ Սնոուդենը հայտարարել է, որ չի վախենում հայրենիք արտահանձնումից՝ ԱՄՆ նախագահի պաշտոնում Դոնալդ Թրամփի ընտրվելուց հետո: Այդ մասին հայտնում է The Guardian-ը:
Սնոուդենի խոսքով՝ խենթություն կլիներ համարել, որ Թրամփը և Ռուսաստանի նախագահ Վլադիմիր Պուտինը չեն կնքի գործարք, որի արդյունքում ԿՀՎ նախկին աշխատակիցը կարտահանձնվի ԱՄՆ: Այնուամենայնիվ, նա չի վախենում նման հեռանկարից:
«Եթե ես անհանգստանայի իմ մասին, եթե իմ անվտանգությունը և ապագան ամենից կարևոր լինեին ինձ համար, ես դեռ կլինեի Հավայան կղզիներում»,- հայտարարել է Սնոուդենը տեսակոնֆերանսի ժամանակ:
Նա հավելել է, որ վստահ է իր ընտրության ճիշտ լինելու մեջ:
2013 թվականի հունիսին նա հեղինակավոր թերթերին գաղտնի նյութեր էր տրամադրել ամերիկյան հատուկ ծառայությունների ապօրինի գործունեության մասին։










