Պակիստանում տաճարի վերակացուն 20 ծխականի է սպանել

20:50 • 02.04.17

Պակիստանի Փանջաբ նահանգի Սարգոդա քաղաքի սուֆիյական տաճար-դամբարանում 20 մարդ է սպանվել, մի քանիսը վիրավորվել են:

Ինչպես տեղեկացնում է BBC  News-ը, ոստիկանության ներկայացուցչի խոսքով` հանցագործության գլխավոր կասկածյալը տաճարի վերակացուն է: Փրկվածներից մեկը ոստիկանությանը պատմել է, որ վերակացուն մեկ առ մեկ իր սենյակ է կանչել հավատացյալներին և նրանց թունավոր ուտելիք տվել:

Հաղորդվում է, որ այդ ուտելիքը տալուց հետո վերակացուն մերկացրել է իր զոհերին և կտտանքների ենթարկել: Տեղի հիվանդանոցից հայտնել են, որ զոհերի մեծ մասի մարմիններին փայտով հավածի հետքեր և դանակի վերքեր են հայտնաբերվել:

Ոստիկանության ներկայացուցչի խոսքով` ձերբակալված վերակացուն իր գործողությունները մեկնաբանել է այն հանգամանքով, որ նախկինում ծխականները փորձել են թունավորել իրեն: