Գյումրու 32/34 ընտրատեղամասում հայհոյանք, դանակով սպառնալիք չի եղել. հանձնաժողովի նախագահ
Գյումրու 32/34 ընտրատեղամասում հայհոյանքներ ու դանակով սպառնալիք չի եղել: Այս մասին Tert.am-ի հետ զրույցում ասաց հանձնաժողովի նախագահ Տարոն Դարբինյանը: Նա նաև հերքեց, թե կրկնակի քվեարկության փորձ է եղել:
Տարոն Դարբինյանը պատմեց, որ որոշակի աղմուկ է առաջացել ընտրողին օգնության փորձ ցուցաբերելու սխալ ըմբռնման պատճառով:
«Մեծահասակ մի կին էր, որը եկավ և ի վիճակի չէր ընտրելու, որից հետո դիտորդներից մեկը՝ «Թրանսփերենսի ինթերնեյշնլ», առանց իմ գիտության, ներս բերեց մեկին, այդ մարդը գրանցվեց և փորձեց օգնել կնոջը: Բայց այս կինը խառնվեց իրար, վատ զգաց իրեն, ես էլ տրամադրեցի նստարան, որտեղ նստեց, ջուր խմեց ու հանգստացավ, բայց հրաժարվեց այդ երիտասարդի ծառայություններից: Այդ ժամանակ եկավ նրա տղան, վրդովվեց, թե այս ի՞նչ եք անում մորս, բայց կոնկրետ ընտրական հանձնաժողովի անդամներից որևէ մեկն այդ կնոջ հետ կապ չի ունեցել: Միայն ասել ենք, որ նստի, մի փոքր հանգստացի և նոր կընտրես: Որդին կարծում էր, թե իր մայրիկին արգելել են ընտրել»,- պատմեց Դարբինյանը:
Հանձնաժողովի նախագահի խոսքով՝ որևէ մեկը չկարողացավ համոզել տղամարդուն, որ օգնեն մորն ընտրություն հարցում, ավելին՝ որդին որոշել է հենց ինքը օգնել: Դարբինյանը շեշտեց՝ ապատեղեկատվություն է հայհոյանքների և վեճերի մասին տարածված լուրերը:
Տարոն Դարբինյանը նաև տեղեկացրեց, որ 32/34 ընտրատեղամասում ընտրելու իրավունք ունի 1100 ընտրող, այս պահին դեռևս մասնակցել է 219 մարդ:










