Ֆրանսիայում 2 անչափահաս աղջիկ է ձերբակալվել ահաբեկչական ակտ նախապատրաստելու կասկածանքով

11:45 • 02.04.17

Ֆրանսիայի հակաահաբեկչական ծառայության աշխատակիցները ձերբակալել են ահաբեկչական ակտ նախապատրաստելու համար կասկածվող երկու աղջկա: Այս մասին հայտնում է France Presse գործակալությունը` հղում անելով իր աղբյուրներին:


Գործակալության տվյալների համաձայն` 14 և 17 տարեկան աղջիկները ձերբակալվել են շաբաթ օրն առավոտյան` Նիցցա քաղաքում և հարևան Լևենս կոմունայում: Նրանց բնակարաններում խուզարկումներ են իրականացվել: Դրանից հետո դատախազության`ահաբեկչության դեմ պայքարի բաժինը նախաքննություն է սկսել:

«Տվյալ փուլում մենք տեղյակ չենք ահաբեկչական ակտի պատրաստության աստիճանի մասին», - գործակալությանը հայտնել է գործի քննությանը մոտ աղբյուրը:

Աղբյուրի խոսքով` խուզարկումների արդյունքում հայտնաբերված ապացույցները թույլ են տալիս ենթադրել, որ իրականացվել է ահաբեկչական ակտի նախապատրաստում, սակայն նշվում է, որ զենք չի հայտնաբերվել: