Տարօրինակ է, որ քեզ փորձում է խեղդամահ անել մարտական թեքվանդոյի չեմպիոնը, հետո հայտարարում, որ իրեն են ծեծել. Տիգրան Աթանեսյան

15:47 • 02.05.17

Օրեր առաջ իր գրասենյակում տեղի ունեցած ծեծկռտուքի դեպքը «Կենտրոն» հեռուստաընկերության «Ուրվագիծ» հաղորդաշարի եթերում փաստաբան Տիգրան Աթանեսյանը որակեց որպես մահափորձ:

«Եթե պալատի (ՀՀ Փաստաբանների պալատի) խնդիրները չլուծվեն, սա վերջին դեպքը չի լինելու: Ես չեմ պատրաստվում իջնել այդքան ու վրեժխնդիր լինել, իմ անձի դեմ չէ, փաստաբանի դեմ է։ Պայքարը հրապարակային է, սա փաստաբան ծեծելու առաջին դեպքը չէ, ցավոք, չեն ուզում հրապարակային դարձնել»,-ասաց նա։

Ըստ փաստաբանի՝ ինքը ճանաչել է այն 4 հոգուն, որ փորձել են խեղդել իրեն, բայց որևէ հարաբերություն, շփում չի ունեցել:

«Ներխուժեցին 4 հոգով: Օգնականիս ասացին, որ դուրս գա, բնականաբար օգնականս դուրս չեկավ, որից հետո անմիջապես խփեցին, ոչ մի խոսակցություն, ոչ մի բան չի եղել: Ես չհասկացա էլ՝ ինչ է կատարվում: Ծեծված չէ, բայց որ քեզ փորձում է խեղդամահ անել մարտական թեքվանդոյի չեմպիոնը, և հիմա նա հայտարարում է, որ ես եմ իրեն ծեծել, ապա շատ տարօրինակ վիճակ է: Բայց եթե ինքն ընդունում է, որ ես իրեն ծեծել եմ, ուրեմն ես Չակ Նորիսն եմ»,- հեգնեց փաստաբանը:

Այս գործողության մոտիվացիան, Տիգրան Աթանեսյանի պնդմամբ, Փաստաբանների պալատին ուղղված իր և իր գործընկերների քննադատությունն է, որ քանի ամիս է՝ հնչեցնում են:

«Ինչի՞ է վերածվել Պալատը, ինչի՞ է գնում փաստաբանությունը, այն իրական վտանգի տակ է, բավականին անդուր բարքեր են ձևավորվել, որոնք արտահայտվում են փաստաբանների դեմ հոդված պատվիրելով և այլ ձևերով»,- ասաց փաստաբանը:

Տիգրան Աթանեսյանը վստահ է, որ հարձակումը եղել է Փաստաբանների պալատի նախագահ Արա Զոհրաբյանի գիտությամբ:

«Ես չգիտեմ՝ ինչպես է ասել, ինչ է ասել, բայց որ իր աշխատակիցներն առանց իր թույլտվության և գիտության բացառվում է՝ ինչ-որ քայլ կատարեն, վստահ եմ: Ես ուղղակի ճանաչում եմ բարքերը, գիտեմ այդ մարդկանց մոտեցումը նախագահին և նախագահի մոտեցումն իր աշխատակիցներին: Դա պարզապես բացառված է, կան բաներ, որ աքսիոմատիկ են»,- վստահեցրեց փաստաբան Աթանեսյանը և նշեց, որ փաստաբանական գրասենյակը հատուկ ռեժիմով հսկվող տարածք է, այնտեղ չի կարելի խուզարկել անգամ: Դատարաններն իրավունք չունեն գրասենյակը խուզարկելու սանկցիա տալ:

«Մարդիկ դա գիտակցելով՝ եկել են ինձ հետ վրեժխնդիր լինելու, և պատճառն ինչ-որ գրառումները չեն: Այսինքն՝ առանց Արա Զոհրաբյանի թույլտվության բացառվում է, որ նրանք գային, հարձակվեին ինձ վրա»,- վստահ է փաստաբանը:

Տիգրան Աթանեսյանը պատմեց, որ ծեծկռտուքը պատճառաբանում են նրանով, որ սոցիալական ցանցում մի փակ խմբում իր գրածները ծեծողներն իրենց են վերագրել և որպես վիրավորանք են ընդունել:

«Թող զանգեին, ճշտեին՝ իրենց եմ նկատի ունեցե՞լ, թե ոչ: Մենք փոքր ժամանակ քյալություն էինք ասում սրան: Եթե զանգեին, գնայինք, խոսեինք, այդ ժամանակ կլիներ տղամարդավարի, ոչ ոք չէր իմանա: Բայց, ցավոք, այդպես չեղավ»,-ափսոսանք հայտնեց Տիգրան Աթանեսյանը:

Նա պարզաբանեց, որ իր և փաստաբանների պալատի նախագահ Արա Զոհրաբյանի հարաբերությունները մինչև անցած տարվա դեկտեմբեր շատ հարթ են եղել:

«13 թվականին, երբ ես պարտվեցի նախագահական ընտրություններում, առաջինը շնորհավորել եմ Զոհրաբյանին և երեք տարի որևէ բանի չեմ խառնվել, ինձ պահել եմ հեռու, ինչպես պիտի պահեր իրեն պարտված թեկնածուն»,-ասաց փաստաբանը:

Ըստ նրա՝ կա մեկ այլ, կոնկրետ պատճառ, ինքը կասկածներ ունի: Ամեն ինչ սկսվել է այն բանից, երբ Արա Զոհրաբյանը, Տիգրան Աթանեսյանի խոսքով, իրեն թույլ է տվել մտնել պալատի անդամների ընտանեկան խնդիրների մեջ:

«Օրինակ՝ Արմեն Սողոմոնյանի տուն նամակ էր ուղարկել 99 թվականի մի դժբախտ դեպքի հետ կապված, գրելով՝ պարոն Սողոմոնյան, Դուք 99 թվականին կենակցելով այսինչի հետ, այ սենց բան է եղել, պատահական կրակոց և մահ... Տուն է ուղարկել, որ Արմենի կինն ու երեխան կարդա՞ն, Արմենի գրասենյակի հասցեն հոյակապ գիտի, որպեսզի ընտանիքում խժդժություններ լինեն, կինը նեղանա, հուզվի, 18 տարի առաջ պատահած մի դեպք:

Հետո իմ ընտանեկան կյանքին վերաբերող տեղեկություններ սկսեցին տարածվել մի կայքով, որ, ես գիտեմ, ղեկավարվում է Արա Զոհրաբյանի կողմից: Մենք էլ որոշեցինք, որ սրան պետք է տանք համարժեք պատասխան: Կարճ ուսումնասիրությունից հետո պարզեցինք, որ նա սովորել է Գլաձոր համալսարանում և միաժամանակ ծառայել է բանակում՝ և, և: Դա հնարավոր չէ»,-նշեց Տիգրան Աթանեսյանը:

Փաստաբանը վստահեցնում է, որ, եթե դիպլոմն անօրինական է, Արա Զոհրաբյանը փաստաբան լինելու իրավունք չուներ, հետևաբար նաև՝ Փաստաբանների գրասենյակի նախագահ:

«Մենք պատրաստվում ենք հայց ներկայացնել Արա Զոհրաբյանի նախագահությունն ու փաստաբան լինելն անվավեր ճանաչելու փաստով: Դատարանը ոնց կորոշի, կորոշի»,-եզրափակեց փաստաբան Տիգրան Աթանեսյանը: