«Ամեն բան կախված է Թուրքիայի կառավարության որոշումից». Բեկչյանը կարող է հրաժարական տալ Պոլսո պատրիարքի տեղապահի պաշտոնից
Պոլսո Հայոց պատրիարքի տեղապահի պաշտոնում ընտրված Գարեգին արքեպիսկոպոս Բեկչյանը հայտարարել է, որ եթե Պոլսո Հայոց պատրիարքի ընտրությունների շուրջ ստեղծված ճգնաժամում մոտ ապագայում դրական տեղաշարժ չնկատվի` նա կարող է հրաժարական տալ։ Այս մասին Բեկչյանն ասել է «Հայ Ձայն»-ի հետ զրույցում:
Հիշեցնենք, որ փետրվարին Էջմիածնում կայացված որոշման համաձայն՝ մարտի 15-ին Ստամբուլում տեղի ունեցավ Պոլսո Հայոց պատրիարքի տեղապահի ընտրություն: Ընտրությունից հետո, որում համոզիչ հաղթանակ էր տարել Բեկչյանը, Ստամբուլի նահանգապետարանն անակնկալ կերպով միջամտեց ընտրություններին: Ստամբուլի նահանգապետի տեղակալը նախքան պատրիարքարանում ընտրությունների սկսվելը գրություն է ուղարկել, որն իրավաբանորեն անհնար է համարում պատրիարքական ընտրությունների գործընթացի մեկնարկը: Այս գրությունը Պոլսո Հայոց պատրիարքի տեղապահի ընտրություններից անմիջապես հետո պատրիարքարանի հոգևորականներին է ներկայացրել տեղապահի ընտրություններում պարտված փոխանորդ Արամ արքեպիսկոպոս Աթեշյանը և հայտարարել, որ չի հեռանա տեղապահի պաշտոնից:
Բեկչյանը նշել է, որ իրավիճակը շարունակում է անկայուն մնալ, և ամեն բան կախված է Թուրքիայի կառավարության որոշումից:
«Նախքան տեղապահ ընտրվելս՝ ես չէի ենթադրում, որ նման իրավիճակում կհայտնվեմ, և եթե կառավարական մարմինների հետ բանակցությունները դրական արդյունքներ չտան` ես կարող եմ հրաժարական տալ», - ասել է Բեկչյանը, ով նաև Գերմանիայի հայ համայնքի հոգևոր առաջնորդն է:
Նշենք, որ Պոլսո պատրիարք Մեսրոպ Մութաֆյանը կոմայի մեջ է գտնվում 2008թ.-ից և փաստացի չի կարող կատարել պատրիարքի իր լիազորությունները։ Նրա փոխարեն այդ լիազորությունները կատարում էր Արամ արքեպիսկոպոս Աթեշյանը, որն ընտրված է ոչ թե համայնքի, այլ պետության կողմից:
Ստամբուլի հայ համայնքի ներկայացուցիչները տևական ժամանակ է՝ պահանջում էին կայացնել նոր ընտրությունների անցկացման որոշում՝ ցանկանալով իրենց առաջնորդի դերում տեսնել ոչ թե պետության կողմից նշանակված, այլ իրենց ձայների արդյունքում ընտրված անձի:










