Ոսկետափ գյուղում 80-ամյա բնակիչը սպանված է գտնվել իր տան բակում
Սեպտեմբերի 6-ին ժամը 22։30-ի սահմաններում ՀՀ Ոստիկանության Արարատի մարզային վարչության օպերատիվ կառավարման կենտրոն ահազանգ է ստացվել, որ Ոսկետափ գյուղի կայարանամերձ փողոցի տներից մեկում իր տան բակում սպանվել է 1937 թվականին ծնված Ս.Թ-ն:
Դեպքի վայր մեկնած օպերատիվ խումբը նշված փողոցի թիվ 11 տան բակում հայտնաբերել է 80-ամյա Սարգիս Թադևոսյանի դին՝ բռնության հետքերով։
Այս մասին Tert.am-ին հայտնեցին ՀՀ ոստիկանության լրատվության և հասարակայնության հետ կապերի վարչությունից:
Սպանության հանգամանքները պարզվում են, կատարվում է քննություն:
Ոսկետափի գյուղապետ Սարգիս Աբրահամյանը Tert.am –ի հետ զրույցում որոշ մանրամասներ հայտնեց սպանվածի մասին: Վերջինս գյուղում հայտնի է «Բուֆետչիկ Սաքո» մականվամբ, նրա կինը մահացել էր վերջերս։
«Անգամ քառասունքը դեռ չի եղել, որդիներն էլ ջահել-ջահել մահացել են: Թոռներ ուներ հարևան գյուղում»,-հավելեց գյուղապետը:
Հարցին՝ ինչո՞ւ կարող էին սպանել 80 տարեկան ծերունուն, Ոսկետափի գյուղապետը պատասխանեց, որ գյուղում այս մասին վարկածներ չեն շրջանառվում:










