Մոսկովյան դատարանը 12 տարվա ազատազրկման է դատապարտել «Սիթիբանկում» պատանդներ վերցրած Արամ Պետրոսյանին
Մոսկվայի շրջանային ռազմական դատարանը հինգշաբթի 12 տարվա ազատազրկման է դատապարտել գործարար Արամ Պետրոսյանին, որն անցած տարի պատանդներ է վերցրել Մոսկվայի կենտրոնում «Սիթիբանկ»-ի մասնաճյուղում, հայտնում է ТАСС-ը:
Դատարանը Պետրոսյանին մեղավոր է ճանաչել ՌԴ քրեական օրենսգրքի 206-րդ հոդվածի 2-րդ մասով (որպես զենք որևէ առարկայի օգտագործմամբ երկու կամ ավելի մարդկանց պատանդ վերցնելու մասին) և 205-րդ հոդվածի առաջին մասով (ահաբեկչական գործողություն): Նրան նշանակվել է պատիժ՝ խիստ ռեժիմի բանտում 12 տարվա ազատազրկման տեսքով: Պատիժը կրելու ժամկետը հաշվարկվելու է նրա կալանքի տակ գտնվելու պահից՝ 2016 թվականի օգոստոսի 24-ից: Դատավորը նաև բավարարել է 50 հազար ռուբլու չափով տուժողի քաղաքացիական հայցը:
Բացի այդ, դատարանը Պետրոսյանին նշանակել է մեկ տարի ժամկետով ազատության սահմանափակում. պատիժը կրելուց հետո նա առանց մասնագիտացած պետական մարմնի թույլտվության չի կարողանա դուրս գալ Մոսկվայի շրջանի սահմաններից և փոխել բնակության վայրը:
Պետրոսյանը կալանքի տակ է վերցվել դատարանի դահլիճում: Դուրս գալով նիստերի դահլիճից՝ նա բղավել է. «Պատմությունն ինձ կարդարացնի»:
Արամ Պետրոսյանը մասամբ ընդունել է մեղքը: Մասնավորապես՝ քննության ընթացքում գործարարն ընդունել է պատանդներ վերցնելու մեղքը, բայց ոչ ահաբեկչության սպառնալիքը: Պետական մեղադրողը խնդրել էր դատապարտել մեղադրյալին 13 տարվա ազատազրկման խիստ ռեժիմի կալանավայրում:
Հիշեցնենք, որ սնանկացած հայ գործարարը մոսկովյան բանկի մասնաճյուղ էր ներխուժել անցած տարվա օգոստոսին և չորս պատանդ վերցրել՝ սպառնալով պայթեցնել շենքը: Նա ինքնակամ հանձնվել էր ոստիկաններին և ավելի ուշ պարզաբանել, որ այդ քայլով ցանկացել է ուշադրություն հրավիրել բիզնեսում առկա խնդիրների վրա:










