ԿԺԴՀ-ի գործողությունները համաշխարհային արձագանք են պահանջում. ՆԱՏՕ

14:19 • 07.09.17

ԿԺԴՀ-ի գործողությունները համաշխարհային սպառնալիք են պարունակում և համաշխարհային արձագանք պահանջում: Այդ մասին Էստոնիայում հայտարարել է ՆԱՏՕ-ի գլխավոր քարտուղար Յենս Սթոլթենբերգը, գրում է ТАСС-ը:


«Հյուսիսային Կորեայի պահվածքը համաշխարհային սպառնալիք է, որը պահանջում է միասնական համաշխարհային պատասխան»,- ասել է նա Տալլինում պաշտպանության նախարարների ոչ պաշտոնական նիստի մեկնարկից առաջ:


«Մենք կոչ ենք արել ԿԺԴՀ-ին ամբողջությամբ համապատասխանել ՄԱԿ-ի բոլոր բանաձևերին, հրաժարվել իր միջուկային և հրթիռային ծրագրից, խուսափել հետագա փորձարկումներից, միանալ կառուցողական երկխոսության»,- հավելել է Յենս Սթոլթենբերգը:


Նա ընդգծել է, որ «միջազգային համայնքի բոլոր անդամները պետք է ամբողջությամբ պահպանեն Հյուսիսային Կորեայի դեմ ՄԱԿ-ի պատժամիջոցները»:


Հիշեցնենք, որ Հյուսիսային Կորեայի իշխանությունները սեպտեմբերի 3-ին պաշտոնապես հայտարարել են միջմայրցամաքային բալիստիկ հրթիռների համար նախատեսված ջրածնային ռումբի բարեհաջող փորձարկման մասին: Հզոր միջուկային փորձարկման հրամանը տվել է երկրի առաջնորդ Կիմ Չեն Ընը: Հարավային Կորեայի պաշտպանական կոմիտեի փոխանցմամբ՝ պայթյունի ուժգնությունը եղել է 100 կիլոտոննա, ինչը բավական է մի ամբողջ քաղաք վերացնելու համար:


Նշենք, որ վերջին մի քանի ամսվա ընթացքում Կորեական թերակղզու շուրջ ճգնաժամային իրավիճակ է ստեղծվել: Արևմուտքը Փհենյանից պահանջում է վերջ տալ միջուկային փորձարկումներին ու դադարեցնել միջուկային ծրագրի զարգացումը՝ սպառնալով հակառակ դեպքում ռազմական միջամտության դիմել: Մինչդեռ պաշտոնական Փհենյանն անտեսում է կոչերն ու իր հերթին սպառնում միջուկային զենքով ջախջախիչ հարված հասցնել ԱՄՆ-ին: